Ինձ հաճելիորեն զարմացրեց վարչապետը. 60 տոկոս էր տիրապետում ինֆորմացիային
Վարչապետ Նիկոլ Փաշինյանի հանձնարարականով աշխատանքային խումբ է ստեղծվել աղետի գոտիներում տնակների ուսումնասիրություն, հաշվառում անելու նպատակով:Աշխատանքային խումբն ըստ էության ավարտել է ուսումնասիրությունները, քարտեզագրել բոլոր ժամանակավոր կացարանները և պարզել դրանցում ապրող ընտանիքների կարգավիճակը, եւ հերթը գործողությունների փուլին է հասել: Առաջարկությունների փաթեթն արդեն պատրաստ է: Վարչապետի եւ աշխատանքային խմբի անդամների հանդիպումը տեղի է ունեցել բոլորովին վերջերս:
Աշխատանքային խմբի անդամ, «Շիրակ կենտրոն» ՀԿ նախագահ Վահան Թումասյանը hraparak.am-ի հետ զրույցում նշում է. «Ես հասկացա, որ ճիշտ էր իմ՝ Գյումրիից Երևան հասնելը, քննարկմանը մասնակցելը: Որովհետև երբեմն գործում է փչացած հեռախոսի տարբերակը:Մենք մտածում ենք,որ պատասխանատու մարմինները՝ նախարարները,մարզպետները,համայնքի ղեկավարները, միմյանց զեկուցում են իրավիճակի մասին,այն ներկայացվում է նաև երկրի ղեկավարին, բայց պարզվեց,որ բավարար չէր, եւ մեր ներկայացնելը նույնպես պետք էր:Ինձ հաճելիորեն զարմացրեց այն,որ վարչապետը խորապես ուզում էր տիրապետել իրավիճակը եւ ցանկություն ուներ ավելին իմանալու , քան անհրաժեշտ է երկրի առաջին դեմքին: Ես իրեն չեմ տեսել ՝ոգևորվել ու դրա համար եմ դա ասում, ճիշտ հասկացեք, այնքան բան եմ տեսել, որ ինձ զարմացնելն այդքան էլ հեշտ չէ: Ո՛չ սերժական եմ, ո՛չ քոչարյանական, ո՛չ էլ նիկոլական»,-ասում է նա ՝ ավելացնելով, թե այդ քննարկումն այնքանով էր արդյունավետ,քանի որ վերջին մեկ տարվա ուսումնասիրությունների արդյունքների ամփոփումն էր , եւ արդեն որոշում է կայացվել անցնել գործողությունների իրականացման փուլին :Մեր հարցին,թե ի վերջո վարչապետը որքանով էր տեղեկացված անօթևանության եւ աղետի գոտուն վերաբերող խնդիրների մասին, մեր զրուցակիցը պատասխանեց. «Խնդիրը շատ մեծ է: Ես իմ ունեցած ինֆորմացիայով նույնպես օգտակար եղա իրեն, նորմալ էր արձագանքում իմ ելույթներին,իսկ ընդհանուր,եթե ասեմ, կասեմ՝ մոտ 60 տոկոս էր տիրապետում ինֆորմացիային»:
Հիշեցնենք,որ միայն Շիրակի մարզում նախնական տվյալներով 3.500-ից ավելի ժամանակավոր կացարան կա, որից 2.871-ը Գյումրիում է:Կառավարության նոր ծրագրով,որի մեկնարկը նախատեսվում է 2020 թվականի հունվարին, 457 ընտանիքի բնակարանով ապահովելու համար հատկացվելու է 3 մլրդ դրամ:Այս հատկացումը սակայն ընդամենը վերաբերում է Լոռու և Շիրակի մարզերի մի քանի գյուղական համայքներին:
Կարծիքներ