Մնացականյանի նոտա VS Քերզոնի նոտա
1923 թ․ մայիսի 8-ին Մեծ Բրիտանիայի կառավարությունը նոտա է հանձնում ԽՍՀՄ կառավարությանը: Այդ նոտան կազմել էր Մեծ Բրիտանիայի արտաքին գործերի նախարար Ջորջ Քերզոնը (1919-1924 թթ.), ինչի համար էլ այն հայտնի է նաեւ «Քերզոնի վերջնագիր» անվանումով: Քերզոնը ներկայացրեց մեղադրանքներ ԽՍՀՄ-ին՝ Արեւելքում հակաբրիտանական քաղաքականության իրականացման համար, եւ պահանջեց 10-օրյա ժամկետում կատարել հետեւյալ պայմանները.
• Իրանում եւ Աֆղանստանում քայքայիչ հակաբրիտանական գործունեության դադարեցում, որն իրականացնում են այդ երկրներում խորհրդային ներկայացուցչություններից
• կրոնական հետապնդումների դադարեցում Խորհրդային Միությունում
• Բարենցի ծովի խորհրդային ջրերում ձկնորսություն անելու համար ձերբակալված անգլիական ձկնորսների ազատում,
• դրամական փոխհատուցում՝ «Դյուքսի խմբի» (M-6 բրիտանական արտաքին հետախուզության սպա Փոլ Դյուքսի անունը կրող) մի շարք մասնակիցների ձերբակալության եւ գնդակահարության համար:
Այս նոտան կարծես 100 տարվա վաղեմության չէ, այլ վերջին տասնամյակների ու վերջին տարիների իրողություններն է արտացոլում, տարբերությամբ, որ այդ նոտայի տարբեր դրույթներ տարբեր երկրներ են հնչեցնում: Օրինակ, Թուրքիան Հունաստանից պահանջում է չխոչընդոտել իր տնտեսական բացառիկ գոտում թուրքական նավերի արշավանքներին: Նույն Թուրքիան Եվրոպայից պահանջում է, ի դեմս «գորշ գայլեր» ծայրահեղականների, դադարեցնել իբրեւ թե կրոնական հետապնդումները եւ այլն:
Խորհրդային Ռուսաստանի, այնուհետեւ ԽՍՀՄ-ի հանդեպ Ջորջ Քերզոնի թշնամական վերաբերմունքը պայմանավորված է եղել նրանով, որ նրանք լուրջ խոչընդոտ են հանդիսացել բրիտանական շահերին Մերձավոր ու Միջին Արեւելքում։ Հայկական հարցում նա վարել է երկդիմի քաղաքականություն՝ հայերի ե
ւ Օսմանյան կայսրությունում բնակվող ազգային փոքրամասնությունների հարցերը ծառայեցնելով Մեծ Բրիտանիայի շահերին։
Հյուսիսային Իռլանդիան օկուպացրած երկիրն ինչո՞ւ պետք է դեմ լինի Ադրբեջանի կողմից Նախիջեւանի եւ Արցախի օկուպացմանը: Ըստ էության, եւս երկու «մեծբրիտանիաներ» են ստեղծվել՝ ի դեմս Թուրքիայի եւ Ադրբեջանի՝ Մերձավոր Արեւելքում եւ Հարավային Կովկասում Մեծ Բրիտանիայի կայսրապետական շահերը սպասարկելու համար: Մինչդեռ Արցախում կարծում են, թե կռվում են Ադրբեջանի, Թուրքիայի ու ահաբեկիչների դեմ:
Հատկապես «հուզիչ» է, հայտնագործության նման մի բան, երբ փաստեր են բերվում պատերազմում ահաբեկիչների մասնակցության մասին: Այդ միամիտ, բայցեւ արժանապատիվ հայերը չեն հասկանում, որ «մեզ մոտ՝ Անգլիայում», այդ ամենի մասին տեղյակ են ամենաբարձր ճշգրտությամբ եւ դեմ չեն, որ նրանք շարունակեն սպասարկել բրիտանական շահերը, ինչը հաջողությամբ արդեն 150 տարի կատարվում է թուրքերի ձեռքով: Հիմա ժամանակները փոխվել են. Թուրքիան այլեւս «արիստոկրատ» երկիր է եւ իրեն վերապահված գործառույթներն իրականացնում է «ցածրորակ» ադրբեջանցիների եւ ահաբեկիչների ձեռքով: Այլապես ինչպե՞ս հասկանալ Մեծ Բրիտանիայի կողմից ՄԱԿ-ի անվտանգության խորհրդում արյունահեղության դադարեցման բանաձեւի վիժեցումը: Վերոնշյալը հիմք է, «Քերզոնի վերջնագրի» նման Զոհրաբ Մնացականյանի հետեւյալ վերջնագիրը Մեծ Բրիտանիայի կառավարությանը ներկայացնելը.
Պահանջում ենք 10-օրյա ժամկետում կատարել հետեւյալ պայմանները.
• Փոքր Ասիայում եւ Հարավային Կովկասում հակահայկական քայքայիչ գործունեության դադարեցում, որը շարունակվում է 1.5 դար
• Միջերկրական ծովում, Թուրքիայի միջոցով, մեր եղբայրական երկիր Հունաստանի ջրերում սադրանքների դադարեցում
• Արցախի պատերազմի զոհերի եւ Արցախին հասցված նյութական վնասի փոխհատուցում
• Հայոց ցեղասպանության զոհերի նյութական եւ գույքային փոխհատուցում:
Պահանջների այս շարքը կարել է շարունակել: Սակայն ավելի որոշակի ու հրատապ քայլ է թվում Հայաստանի Հանրապետությունում Մեծ Բրիտանիայի դեսպանին արտաքին գործերի նախարարություն հրավիրելը եւ նոտա հանձնելը՝ ՄԱԿ-ի անվտանգության խորհրդում Արցախին վերաբերող բանաձեւը տապալելու համար: Եթե չբերվեն հիմնավոր փաստարկներ եւ չհայցեն ՀՀ-ի ու ԱՀ-ի ներողամտությունը, ապա դեսպանատան ամբողջ անձնակազմին պետք է հայտարարել person non grata: Մնում են Հայաստանում, որ ի՞նչ անեն, առավել եւս, որ նույնիսկ վարչապետի ուղղակի ու ոչ երկիմաստ հայտարարությունից հետո էլ չեն բարեհաճել այցելել Հայաստանի Հանրապետության հրթիռակոծված վայրեր:
Գագիկ ՎԱՐԴԱՆՅԱՆ
Կարծիքներ