Դա հարգանքի ժեստ էր. քովիդով վարակված համայնքապետի ԺՊ-ն քարոզարշավի է մասնակցել
Կողբի համայնքապետի պաշտոնակատար Սերյոժա Ավագյանը, կորոնավիրուսով վարակված, նոյեմբերի 30-ին, նախընտրական քարոզարշավի է մասնակցել։
Նա «Հրապարակ»-ի հետ զրույցում ասաց, որ ինքը այդ մի օրն է դուրս եկել` դիմակով. «Ես հիմա մի հատ էլ հավելյալ թեստ կտամ, ես տաքություն չունեմ։ Իսկ այդ օրը, որ իմ գյուղն էր, դիստանցիա պահելով՝ դուրս եմ եկել։ Ես ընդհանրապես քարոզարշավին չեմ մասնակցել։ Նոյեմբերի 30-ին ՔՊ-ի քարոզարշավն էր. Կարեն Աբազյանի գլխավորությամբ եկել էին գյուղ»։
-Վստա՞հ եք, որ այդ օրը որեւէ մեկին չեք վարակել։
-Այո։ Որովհետեւ թեկուզ այդքան մարդկանց մեջ հեռու կանգնել եմ, մարդիկ նորմալ են, ոչ մի նախանշան չունեն։ Այսինքն` այս հիվանդությունը անցել է իմ։
-Բայց Դուք թեստի բացասական պատասխանն էլ չունեիք այդ օրը։
-Հիմա ես հավելյալ թեստ կտամ։ Ես ոչ մի նախանշան չեմ ունեցել, դիմակով կանգնել եմ։
-Ձեզ «վերևներից» հրահանգե՞լ են ներկա լինել։
-Չէ, չէ, նման բա չկա։ Հիմա եթե մյուս ուժն էլ գա, ես կգնամ։ Դա որպես հարգանքի ժեստ, որ գյուղ են մտնում։
-Ձեզ չէի՞ն հասկանա, որ վարակակիր եք՝ եթե ներկա չլինեիք։ Այդքան հորդորում են իշխանությունները` պահպանել հակահամաճարակային կանոնները։ Պարոն Աբազյանը կնեղանա՞ր։
-Չէ, չէր նեղանա։
-Իսկ Ձեզ չե՞ն նախատել, որ այդպես մտել եք մարդկանց մեջ։
-Ես չգիտեմ`ով պիտի նախատեր։ Կարեն Աբազյանն ինձ ասաց` պարտադիր չի ներկա լինես։
-Պարոն Աբազյանը քարոզարշավի օ՞րն ասաց։
-Իրենք, որ եկան, ես դուրս եկա, ասաց`պարտադիր չի մասնակցես։
Նշենք, որ դեկտեմբերի 5-ին Նոյեմբերյանում ՏԻՄ ընտրություններ են, իշխանության թեկնածուն նախկին ՀՀԿ-ական Կարեն Աբազյանն է։ Հիշեցնենք նաեւ, որ ժամանակին օրենքում փոփոխություն կատարվեց՝ կորոնավիրուսով հիվանդ մարդկանց կողմից մեկուսացման կաննոները չպահպանելու համար, իսկ միտումնավոր կերպով մարդկանց վարակելն անգամ քրեական պատժի ենթակա արարք ճանաչվեց։
Կարծիքներ