Դրանք վախկոտ ցեղ են, որ մի հատ մռութներին հասցնենք, էլ ռիսկ չեն անի առաջ գալ
Երեկ հերթական խայտառակ տեղեկությունը ստացանք Արցախից` ադրբեջանական կողմը փակել է Արցախ-Հայաստան սահմանագծին գտնվող Հակարիի կամուրջը, որը գտնվում է ՌԴ խաղաղապահ զորակազմի պատասխանատվության տիրույթում՝ Լաչինի միջանցքում: Ադրբեջանի ԱԳՆ-ն մեկնաբանել է Հայաստանի հետ սահմանին անցագրային կետ տեղակայելու վերաբերյալ տեղեկությունը՝ հայտարարելով, որ իբրև թե` «Ադրբեջանը կստեղծի բոլոր պայմանները Լաչինի ճանապարհով հայերի տեղաշարժի համար»։ «Եռակողմ հայտարարությամբ ստանձնած պարտավորությունների համաձայն՝ այս լրացուցիչ միջոցառման շրջանակում, որը Ադրբեջանի Հանրապետության կողմից անվտանգության երաշխիք է Լաչինի ճանապարհով քաղաքացիների, տրանսպորտային միջոցների և ապրանքների տեղաշարժի համար, կստեղծվեն անհրաժեշտ պայմաններ Ադրբեջանի Ղարաբաղի տարածաշրջանում բնակվող հայ բնակիչների՝ այս կետից Հայաստան և Ադրբեջան երկու ուղղություններով թափանցիկ և կանոնակարգված անցման համար»,- նշվում է հաղորդագրության մեջ։ ԱԳՆ-ի հաղորդագրությամբ պաշտոնական Բաքուն հայտարարել է, որ «վերահսկողության տվյալ մեխանիզմն իրականացվելու է ռուսական խաղաղապահ զորակազմի հետ համագործակցությամբ»։
Շուշիի քաղաքապետ Արծվիկ Սարգսյանը «Հրապարակի» հետ զրույցում ասում է, որ Ադրբեջանն ուղղակի թքած ունի նոյեմբերի 9-ի համաձայնագրի վրա և անում է այն, ինչ ցանկանում է: Չստանալով համապատասխան պատասխան` օր օրի ավելի է լկտիանում. «Այս ընթացքում նույն այդ Ադրբեջանն ինչ արել է, անպատիժ է մնացել: Այսօր էլ Հայաստանն իր ձեռքերն Արցախից լվացել է: Իշխանությունները հայտարարում են, որ Ղարաբաղն Ադրբեջան է, դրանից հետո պարզ է, որ այսպես պետք է լիներ: Ես վաղուց էի սպասում այս օրվան: Շուշին վերցնելով, նրանք Հակարիի կամուրջը գրավելու հնարավորություն ունեին: Մենք ունեինք փրկության ճանապարհ, այն նոր ճանապարհի կառուցումն էր, սակայն թշնամին ցանկանում է ամեն գնով դրա դեմն առնել: Ադրբեջանն իր ասածներին տեր է կանգնում և անում է այն, ինչ ասել է: Ո՞վ է դեմն առնողը, որ չանի: Ադրբեջանական ջրաղացին այս իշխանությունները ջուր են լցնում: Թրքամետ ղեկավարների պարագայում ես ամեն ինչ սպասում եմ: Ամեն ինչ հնարավոր է: Ինչի՞ց պետք է վախենան»,- ասում է Արծվիկ Սարգսյանը:
Սարգսյանի կարծիքով` անհասկանալի է, որ ռուսական կողմը թույլ է տալիս Ադրբեջանին լկտիաբար իրենց ցանկություններն իրագործել. «Եթե ռուսական կողմը հսկում է, հասկանալի չէ, թե ինչու են սրանք այսպես անում: Հաբրգած ամեն ինչ անում են, վաղն էլ մի ուրիշ բան են անելու: Ամեն օր առաջ են գալիս, բայց դեմն առնողն ո՞վ է: Մենք պատրաստ ենք հակահարված տալ, բայց ռուս խաղաղապահների միջամտությունը խանգարում է: Դրանք վախկոտ ցեղ են, վախկոտ եղել են, վախկոտ էլ կմնան, որ մի հատ մռութներին հասցնենք, էլ ռիսկ չեն անի առաջ գալ: 90-ականներին Արցախն ավելի ծանր շրջափակման մեջ է եղել, քան այսօր, սակայն այն ժամանակ Հայաստանը եղել է Արցախի թիկունքին, իսկ այս պահին Հայաստան չկա: Հայաստանն Ադրբեջանի շահերի մասին Ադրբեջանից շատ է խոսում»,- ասում է մեր զրուցակիցը:
Հարցին, թե Արցախն ինչպե՞ս է կարողանում չորսուկես ամիս բլոկադայի մեջ գոյատևել, Արծվիկ Սարգսյանն ասաց. «Մարդկանց համար բնական բան է դարձել: Եթե ասեմ բարձր տրամադրություն ունեն` ոչ: Ամեն ինչ ազդում է մարդկանց հոգեբանության վրա: Կան հիվանդներ, երեխաներ, ոնց էլ լինի Ադրբեջանի դաժան քայլերն իրենց ազդեցությունը թողնում են: Եթե այսպես շարունակվի, վաղն էլ կարող է ցեղասպանության վտանգ առաջանալ, ո՞վ է Ադրբեջանի ձեռքերը կապելու: Խանութներում հերթեր են, ամենուր հերթեր են, բայց միևնույն է՝ մարդիկ մարտական են տրամադրված: Ուրիշ գնալու տեղ չունենք, սա մեր հողն է, մնալու ենք ու պայքարենք: Մեր հույսը մենք ենք: Աշխարհը խուլ է ու համր: Եթե այսպես պետք է լիներ ամեն ինչ, ինչո՞ւ էր Նիկոլ Փաշինյանն ասում՝ «Արցախը Հայաստան է և վերջ», եթե պետք է այսօր ասի՝ Տեղ գյուղից այն կողմ Ադրբեջան է: Ամեն ինչ ուտելու մեջ չէ, այնպես չէ, որ սննդով ապահովում են, վերջ` դա է Արցախի միակ խնդիրը: Իմ կոչը հետևյալն է` լինել միասնական, նոր պայքար սկսել: Մինչև թուրքի մռութին չխփենք, մեզ չեն ենթարկվելու ու չեն նահանջելու: Եթե այսպես շարունակվեց․ Երևան էլ են հասնելու»-, խոսքը եզրափակեց Արծվիկ Սարգսյանը:
Կարծիքներ