Վատ լուր ունեմ ՀՀ ներկայիս գերխաղաղասեր իշխանությունների համար. Արման Աբովյան (տեսանյութ)
Արման Աբովյանը ֆեյսբուքյան իր էջում տեսանյութ է հրապարակել՝ կից գրելով.
«Վատ լուր ունեմ ՀՀ ի ներկայիս գերխաղաղասեր իշխանությունների համար։
Հանձնելով Արցախը, ոչնչացնելով ազգային և պետական սկզբունքները, խայտառակվելով բոլոր հնարավոր և անհնարին դիվանագիտական, քաղաքական, բարոյական ձևաչափերով՝ Հայաստանը չկարողացավ ստանալ խաղաղություն։
Իրենց բոլոր «Հոռոմ տատու» հեքիաթները, որ, իբր թե, ներկայիս իշխանությունների քաղաքականությունը տանում է դեպի «խաղաղության և բարեկեցության դարաշրջան», ջախջախվում են դառը իրականությանը բախվելիս։
Ասեմ ավելին՝ Հայաստանը փաստացի գտնվում է պատերազմի մեջ, և միայն կատարյալ տհասը դա կարող է "չտեսնել"։
Թուրք֊ադրբեջանական զորքերը զավթել են Հայաստանի ինքնիշխան տարածքը, պարբերաբար ռազմական բախումներ են տեղի ունենում Հայաստանի սահմաններին և մեր ինքնիշխան տարածքի ներսում, զոհվում և վիրավորվում են հայեր, թշնամին ահաբեկում է խաղաղ բնակչությանը՝ զուգահեռ գրեթե ամեն օր պնդելով, որ Հայաստանի ողջ տարածքը պատկանում է իրենց՝ քոչվոր թուրքալեզու ցեղերին։
Դրա հետ մեկտեղ Հայաստանում հանգիստ գործում են թուրքերի և ադրբեջանցիների բացահայտ պրոպագանդիստական (և, միգուցե, գործակալային) ցանցեր, որոնք ակնհայտ տանում են հակաարցախյան քարոզչություն։
Եթե վերոհիշյալ փաստերը չեն վկայում, որ մենք պատերազմի մեջ ենք, ապա ո՞րն է այդ դեպքում պատերազմը։
Եվ այս աննորմալ, աբսուրդային, վտանգավոր իրավիճակի ներքո իշխանությունները պատրաստվում են, իբր, սահմանազատման ներքո թշնամուն փաստացի հանձնել արդեն Հայաստանի տարածքները։
Հա՛, մեկ էլ մի բան՝ հույսներդ կտրեք, որ պատերազմը չի գալու ձեր քաղաքներ և գյուղեր.․․ ոչ ոք՝ ոչ մի «ձուկ» և ոչ մի «մուկ» չի պլստալու։
Այնպես որ, Ապագա Կա՛ ...վայելե՛ք։
Հ․Գ․
Խաղաղությունը չեն մուրում, խաղաղությունը վաստակում են»։
Կարծիքներ