Հազիվ քո ոտքով մտել էիր մետրո, դուրս չգայիր, էլի

Հազիվ քո ոտքով մտել էիր մետրո, դուրս չգայիր, էլի

Դե ինչ, Նիկոլ Փաշինյանը հասցրեց մետրո նստել, քանի դեռ մեկ ուղղությամբ երթեւեկության արժեքը 100 դրամ էր: Արձանագրենք սույն փաստը եւ սպասենք այն օրվան, որ այդ կծծին 300 դրամանոց մետրո կամ ավտոբուս կնստի: Տեսնենք, թե այն ժամանակ ինչեր է երգելու «բարդացված» եւ թանկացված ուղեւորափոխադրումների մասին: Մեծ բան, էլի, 100 դրամ գցեց Թելսելի ծակի մեջ, Թելսելը տոմս տվեց, ինքն էլ նստեց մետրո ու եկավ աշխատանքի: Եթե ողորմածիկ պապս էլ ախրանա ունենար, մետրոյի կայարանն ու Թելսելի շրջակայքը մաքրեին քաղաքացիներից, կկարողանար տոմս առնել ու մտնել մետրո: Այսինքն, մի մեծ բան չէ արածը. մետրո է նստել, իսկ թե ինչու այդպիսի աղմուկ-աղաղակով, մնում է միայն գուշակել: Փորձենք հասկանալ:

Արդյո՞ք երեկվա մետրո-ներկայացումը տրանսպորտի միասնական վճարային համակարգի անճաշակ գովազդ չէր: Տեսա՞ք, Նիկոլն էլ օգտվեց այդ համակարգից ու գոհ մնաց: Իհարկե, գովազդ էր, այն էլ՝ ինչպիսի անճաշակ գովազդ: Րաֆֆին կասեր՝ առավոտ էր, Արարատյան դաշտի լուսապայծառ առավոտներից մեկը: Երեւանի մետրոյի կայարաններում աշխատանքային աշխույժ ուղեւորափոխադրումներ էին սկսվել: Կայարաններից մեկը, սակայն, դատարկ էր ու ամայի, որովհետեւ գալու էր Մերուժան Արծրունին՝ իր զորքով, եւ ոչ մի հասարակ մահկանացու չպետք է երեւար Մերուժանի աչքին: Ամեն ինչ պատրաստ էր այդ այցի, ինչպես նաեւ Մերուժանի կապիկությունները լավագույնս նկարահանելու համար: Սովորական մետրոյի կայարան էր: Չկար միայն մարդը…
- Էս ինչ լավ էլ Թելսելի ապարատ է, էս ինչ արագ էլ տոմս է տալիս,- մետրո տեսած գեղցու պես գոհունակություն հայտնեց Նիկոլն ու մի ձեւ հասավ գործի:

Ի դեպ՝ չիմացանք, թե որ կայարանից նստեց, բայց ենթադրում եմ, որ իջավ «Հանրապետության հրապարակ» կայարանում եւ մինչեւ կառավարության շենք ոտքով գնաց: Այդ ճանապարհին, սակայն, նա հասցրեց մի լավ գյալաջի անել ինքն իր հետ եւ արդարացնել տրանսպորտի թանկացումը, որն իր եւ իր ընտանիքի բյուջեի վրա որեւէ կերպ չի անդրադառնալու: Ասա՝ քո ոտքով մտել էիր մետրո, դուրս չգայիր, էլի…

Դիմեց նախ թոշակառուներին.
- Ի՞նչ վատ բան կա տրանսպորտի թանկացման մեջ, եթե ձեր «քեշբեքով» կարողանալու եք մեկ ամիս տրանսպորտից օգտվել… 30 տոկոս զեղչն էլ չմոռանանք…

Հիմա հասկացա՞ք, որ մետրոյում նկարված անհաջող գովազդը զուտ գովազդ չէր: Նիկոլի թիրախը, իրականում, ՀՀ քաղաքացին էր, որի ուղեղում պետք է ամրակայվեր եւ արդարացվեր, այսպես կոչված, տրանսպորտային թալանը: Դե իսկ թոշակառուները, եթե ուղեղ ունեն, թող հասկանան, որ իրենց «քեշբեքն» ինչպես տվել էին, այնպես էլ ձեռքներից առան:

Հաջորդիվ հաշմանդամներին դիմեց՝ վա՞տ է, որ այս բարեփոխման (թանկացման) շնորհիվ դուք, որ անվճար օգտվում էիք միայն էլեկտրական տրանսպորտից, այսուհետ կարողանալու եք օգտվել նաեւ ավտոբուսներից… Կարելի է մտածել՝ պետությունն է հոգացել տեղաշարժման դժվարություններ ունեցող մեր հայրենակիցների այդ հոգսը: Մի՞թե այդ հարցը չի լուծվել հենց իրենց՝ քաղաքացիների հաշվին, որոնք փետրվարի 1-ից ավելի մեծ գին են վճարելու քաղաքային տրանսպորտով երթեւեկելու համար:

Այսպես գյալաջի անելով՝ հասավ նաեւ ուսուցիչներին: Սիրելի ուսուցիչներ, մի հարցնող լինի՝ դո՞ւք ինչու եք դժգոհում տրանսպորտի թանկացումից: Էն, որ գնացել, կամավոր ատեստավորում եք անցել ու բարձր աշխատավարձ եք ստանում, մի՞թե աշխատավարձի այդ հավելումը չի կոմպենսացնում տրանսպորտի թանկացումը…
Ի՞նչ ասեմ՝ չգիտեմ: Աշխարհ, կանգնիր, հանճարեղ վարչապետս տեղ հասավ… Փաստորեն չգիտեինք, որ ուսուցիչները կամավոր ատեստավորում են անցել, որպեսզի ավելի թանկ երթեւեկեն: Շնորհավորում եմ, թանկագին ուսուցիչներ, դուք միշտ մեր կառավարության ուշադրության կենտրոնում եք:

Ես այսքանը միայն կարողացա ֆիքսել վարչապետի մետրոյախառը գովազդից եւ Երեւանի մաքուր օդում նրա տարածած հանճարեղ մտքերից: Մնացածի մասին արդեն պողոսները կխոսեն փետրվարի 1-ին եւ դրանից հետո:

ՀԳ. Ամեն դեպքում՝ Թելսելի բոլոր ապարատների մոտ պարեկներ դրեք: