Ինքը հրաման է ստորագրել, ինքն էլ չեղարկել է իր հրամանը

ԵՊՀ ռեկտորի պաշտոնակատարը Հովհաննես Հովհաննիսյանն այսօր հրաման էր ստորագրել, համաձայն որի՝ ԵՊՀ բոլոր աշխատակիցները, որոնք չեն ցանկանում պատվաստվել, յուրաքանչյուր ամիս՝ 15 օրը մեկ, կստանան 3000 դրամ փոխհատուցում ՊՇՌ թեստավորման համար: Այս մասին հաղորդագրություն էր տարածել Մայր բուհի մամուլի ծառայությունը, որի ղեկավարը լրիվ նոր է նշանակվել` գրականագետ Գևորգ Էմին- Տերյանի փոխարեն։ Սակայն ընդամենը ժամեր անց Հովհաննիսյանը չեղարկել է իր հրամանը՝ ներկայացնելով հետևյալ պարզաբանումը․

«Հրամանի հրապարակումից հետո դրա կիրառման վերաբերյալ մենք բազմաթիվ հարցադրումներ ստացանք: ԵՊՀ-ն բավականին մեծ կառույց է, որն ունի շուրջ 2500 աշխատակից, հետևաբար օբյեկտիվորեն հրամանով նախատեսված փաստաթղթերի հավաքագրումը, ապա փոխհատուցման կազմակերպումը ժամանակատար ու աշխատատար են: Բացի դրանից, մասնագետների պնդմամբ, փոխհատուցման ընթացակարգը հարկային որոշակի պարտավորություններ է ի հայտ բերում, քանի որ այն դիտարկվում է իբրև եկամուտ: Կան նաև այլ դժվարություններ, որոնք, անկեղծ ասած, ի սկզբանե չէին գնահատվել: Հաշվի առնելով բոլոր հարցադրումներն ու ի հայտ եկած դժվարությունները՝ ես ուժը կորցրած եմ ճանաչել այս հրամանը՝ հնարավոր սխալներից, բացթողումներից և դժգոհություններից խուսափելու համար»,- ասել է Հովհաննիսյանը։

Ինչպես ասվում է ժողովրդական ասացվածքում․ «ԵՊՀ ղեկավարելը թթու թան չէ, ամեն մեկի բան չէ», և ինչպես Հովհաննիսյանն է նշել՝ ԵՊՀ-ն բավականին մեծ կառույց է, և հրամաններ արձակելուց առաջ նախ պետք է մի քիչ մասնագետների հետ զրուցել ու որոշակի հաշվարկներ անել։