Դեպքը եղել է, ծնողներն էլ անհանգստացած են․ մի քիչ հազ, փռշտոց լինում է, բերում են հիվանդանոց

Հանրապետությունում գրիպով և սուր շնչառական վարակներով հիվանդացության դեպքերը դեռ նվազման միտում չունեն: Կոտայքի  մարզի դպրոցներում  բացակայությունների թիվն ավելացել է, Հրազդանում անգամ H1N1 վիրուսով 1 դեպք գրանցվել: Հիվանդության տարածվածությունը հաշվի առնելով՝ ծնողները խուսափում են երեխաներին դպրոց բերել, այդ պատճառով դժվարանում ենք ասել, թե բացականերից քանիսն են հիվանդ, մեզ հետ զրույցում ասացին դպրոցի տնօրենները: Այս օրերին պոլիկլինիկական ծառայություններում դիմելիությունը եւս կրկնակի աճել է: 

Հրազդանի Աս. Մռավյանի անվան N 4 հիմնական դպրոց տնօրեն՝ Արեւիկ Նահապետյանը  մեզ հետ զրույցում ասաց, որ այսօր  բացակայում են 35 աշակերտներ, որոնցից՝ 25-ը՝ սուր շնչառական հիվանդությամբ: 
 

Վ. Սարոյանի անվան N 11 հիմնական դպրոցում գրացվել է  H1N1 վիրուսով  1 դեպք: Տնօրեն Արամ Խաչատրյանը նշեց, որ 1333 աշակերտներից բացակայում են 427-ը:

«Դպրոց հաճախողների թիվը 1333 է, որից այսօր  բացակայում են 427 աշակերտներ: Ավելի շատ խուճապ է, քան երեխաները հիվանդ են: Ես զանգ եմ ստանում ծնողներից, նրանք հարցնում են, թե բերենք երեխաներին դպրո՞ց, թե՞  չբերենք: Մենք արդեն բոլորս էլ գիտենք, թե այդ վիրուսը մարդ ոնց է տանում: Իրազեկվածության պակաս լինելու պատճառով ծնողների մոտ մի տեսակ խուճապ  է առաջանում, վախից չեն բերում, չեմ հերքում,  կա նաեւ վիրուս: Ես զրուցել եմ բուժհաստատության հետ,  427 երեխայից ընդամենը 1 հոգի է դիմել բժշկական կենտրոն: Մենք մարզպետարանից եւ առողջապահության նախարարությունից գրություններ ենք ստացել, որ ամեն առավոտ ֆիլտրենք: Մեր բուժքույրերը կանգնում են դռան մոտ եւ այն երեխաները, ովքեր ջերմություն ունեն, գրիպ են, կամ լավ չեն զգում, հետազոտությունից հետո, եթե երեխայի մոտ նման բան է նկատվում, ուղարկում ենք տուն, հորդորով, որ տանեն հիվանդանոց»:

«Այսօր ունենք 26 բացակա, որից 16 սուր շնչառական վիրուսով հիվանդ են: Մեզ մոտ անցած շաբաթ էր շատ բացակայությունների թիվ: Այս շաբաթ արդեն հաճախումները նորմա է»,.-ասաց Հրազդանի Հովսեփ Օրբելու անվան N 13 ավագ դպրոցի տնօրեն Սոնա Մարկոսյանը: 

«H1N1 վիրուսի Հրազդանի  ԲԿ-ում ախտորոշում չենք կարող անել»,-ասում է Հրազդանի ԲԿ-ի բժշկուհի Նարինե Աբրահամյանը.  

«1 դեպք է եղել, որը ախտորոշվել է Արաբկիր ԲԿ-ում, ոչ թե մեզ մոտ, հիվանդը իրենց հսկողության տակ է, պարբերաբար բուժում է ստանում: Հիվանդանոցում պառկած դեպքերը չեն ավելացել, իսկ դիմելիությունը  շատ է: Պարզ է, որ դեպքը եղել է, ծնողներն էլ անհանգստացած են,  մի քիչ հազ, փռշտոց լինում է, անպայման բերում են հիվանդանոց»։