Ավելի քան երկու տասնամյակ հայրենիք չայցելած Եվգենի Պետրոսյանը մենահամերգ կտա Երևանում
Ավելի քան երկու տասնամյակ հայրենիք չայցելած Եվգենի Պետրոսյանը Երևանում է «Սիրով դեպի Հայաստան» մենահամերգներով:
Նոյեմբերի 20-ին և 24-ին Արամ Խաչատրյան համերգասրահում կկայանան Ռուսաստանի Դաշնության ժողովրդական արտիստ Եվգենի Պետրոսյանի «Սիրով դեպի Հայաստան» մենահամերգները:
Ավելի քան հինգ տասնամյակ Եվգենի Պետրոսյանը ստեղծագործում է հումորի ոլորտում և այսօր հանդիսանում իր ժանրի վարպետը, էստրադայում սիրված և ամենաճանաչված արտիստներից մեկը: Մեր տաղանդաշատ հայրենակիցը՝ որպես ռեժիսոր, հեղինակել և ստեղծել է հարյուրից ավելի ներկայացում, համերգային ծրագիր և հազարավոր հեռուստահաղորդումներ՝ այդ թվում. «Պետրոսյան շոու», «Հումոր! Հումոր !! Հումոր !!!» և «Սմեխոպանորամա», որոնք հաջողությամբ եթեր են հեռարձակվում Ռուսաստանի դաշնային հեռուստալիքներով:
Նա նաև շարունակում է ակտիվ համերգային շրջագայությունները, իրականացնում զանազան նոր մտահղացումներ ու նախագծեր: Նրա յուրաքանչյուր ելույթ անցնում է մեծ հաջողությամբ, արժանանալով հանդիսատեսի և մեծաթիվ հավատարիմ երկրպագուների բարձր գնահատականին։
Երևանյան մեծ մենահամերգի ծրագրում ընդգրկված են ինչպես արդեն հայնտի, այնպես էլ նոր հումորային մենախոսություններ, զվարճալի մանրապատկերներ, ֆելիետոններ: Հանդիսատեսի ուշադրությանը կներկայացվեն արտիստի հարուստ խաղացանկի լավագույն համարները, որոնցով նա տարիներ շարունակ հաջողությամբ ելույթ է ունենում մեծ բեմում։
Կարծիքներ