Ամսական 375 դոլար՝ Եվրոպայում ապաստանած մեկ ուկրաինացու հաշվով
Ամսական 375 դոլար, կամ՝ 157 հազար 500 դրամ են ծախսում ուկրաինացիների վրա, եթե նկատի առնվի, որ ԵՄ երկրներում և Մեծ Բրիտանիայում արդեն ապաստան են ստացել 4 միլիոնից մի փոքր ավելի ուկրաինացիներ, իսկ ԱՄՆ իշխանություններն ուկրաինական բյուջեին կհատկացնեն ամսական 1.5 միլիարդ դոլար՝ որպես աջակցություն տնտեսությանը: Փողն ինչ է` թուղթ: Բայց մարդը…
Փաստորեն, բացի նրանից, որ որոշ երկրներ գերշահույթներ են ստանում ռուս-ուկրաինական պատերազմից՝ ծանրաբեռնելով իրենց ռազմական արդյունաբերությունը, լոգիստիկ համակարգերը, հին սպառազինություններից ազատելով պահեստները, նրանք նաև բավական փոքր ծախսերով լուծում են իրենց ժողովրդագրական խնդիրները. Եվրոպայի բնակչությունը մի քանի ամսում մեծացավ 4 մլն. մարդով: Որպեսզի պարզ լինի, թե դա ինչ մեծ թիվ է, բավական է բերել ընդամենը մեկ թիվ: 2021 թվականին ԵՄ բնակչությունը կազմել է 447 միլիոն մարդ, 2018 թվականի համեմատ աճը կազմել է 1.6% կամ՝ 7.1 մլն. մարդ: Այսինքն՝ 2022 թվականի 9 ամսում հավելաճը կազմել է 0.9%:
Ընդ որում, խոսքը վերաբերում է ոչ միայն քանակական կողմին, այլև՝ որակական:
Դե, ուկրաինուհիներ, ուկրաինացիներ, խառն ամուսնություններ, ինչպես նաև բնակչության երիտասարդացում: Ինչպես կասեր Քաջ Նազարը, արյունն ազնվացնում են՝ իրենց, վաղուց արդեն ոչ այնքան ազնվական արյունը փոխարինելով ազնվացեղ ուկրաինացիների արյամբ: 30-40 տարի անց, Եվրոպան ավելի կգեղեցկանա…մտավոր առումով էլ, գուցե, առաջընթաց լինի, որովհետև վերջերս ծերունի Եվրոպան մի տեսակ անտանելի է դարձել:
Լավ, մի՞թե Եվրոպայում չկա մի առաջնորդ, որպեսզի այս ամենի համար հայտնի իր երախտագիտությունը Ռուսաստանին…միայն պատժամիջոցներ, պատժամիջոցներ: Անհասկանալի է, մի խելքը գլխին ուղեղային կենտրոն էլ չկա՞, որ քաղաքական որոշումներ կայացնողներին բացատրի՝ ծովային և միջուկային երկրին անհնար է պատժամիջոցներով ծնկի բերել:
Անհավանական է, բայց թվում է, թե ԵՄ-ի «խնդրանքով» է Ռուսաստանը երկարաձգել հատուկ ռազմական գործողության ժամկետը: Եվս մեկ տարի, և ԵՄ-ը դուրս կգա «ժողովրդագրական փոսից»:
Գագիկ Վարդանյան
Կարծիքներ