Կառավարությունը խուսափեց պատասխանել Աղվան Վարդանյանի հարցին (տեսանյութ)

Այսօր Ազգային ժողովում կառավարության հետ հարցուպատասխանի ժամանակ ԱԺ «Հայաստան» խմբակցության պատգամավոր Աղվան Վարդանյանը հարց ուղղեց Նիկոլ Փաշինյանին Հայաստան-Թուրքիա փոխադարձ դրական ազդակների թեմայով: 
Մինչ հարցը հնչեցնելը նա ենթադրեց, որ երկու հոգի կարող են պատասխանել իր հարցին.  «Արտգործնախարարը, որն այստեղ չէ, երկրորդը՝ դուք որոշեք»:

Ապա հիշեցրեց, որ. 

Կան 2009 թվականի ցյուրիխյան արձանագրությունները, կա դրանց վերաբերյալ ՀՀ Սահմանադրական դատարանի 2010թ. Հունվարի 12-ի որոշումը: Եւ ՍԴ-ն այդ որոշմամբ կարմիր գծեր է հաստատել, որոնք են`

ա) արձանագրություններով ստանձնվող փոխադարձ պարտավորությունները ունեն բացառապես երկկողմանի բնույթ և չեն կարող վերաբերվել որևէ երրորդ կողմի: Բնականաբար խոսքը Ադրբեջանի մասին է:

բ) Չեն կարող մեկնաբանվել ու կիրառվել այնպես, որը կհակասի ՀՀ Սահմանադրության նախաբանի դրույթներին:

գ) Չեն կարող մեկնաբանվել կիրառվել այնպես, որը կհակասի Հայաստանի Հանրապետության անկախության մասին հռչակագրի11-րդ կետի պահանջներին: Այն է՝ ՀՀ-ն սատար է կանգնում 1915թ. Օսմանյան Թուրքիայում և Արևմտյան Հայաստանում հայոց ցեղասպանության միջազգային ճանաչմանը:

Ապա հնչեցրեց հարցը. «Կառավարությունը կարո՞ղ է երաշխավորել, որ հայ-թուրքական հարաբերությունները կարգավորելիս Սահմանադրական դատարանի հաստատած կարմիր գծերից նահանջ չի արձանագրվելու»:

Աղվան Վարդանյանի այս հարցին, սակայն, կառավարությունր պատասխան չուներ այդ պահին: Ուստի խնդրեցին գրավոր ուղարկել հարցը:

Աղվան Վարդանյանը դահլիճից դուրս գալուց հետո մեզ ասաց, որ քանի որ արտգործնախարարը ներկա չէր նիստին, հետևաբար կառավարությունն ի վիճակի չէ այդ հարցին պատասխանելու, այդ թվում՝ Նիկոլ Փաշինայնը։

Մանրամասն՝ տեսանյութում