Սերժ Սարգսյանի այցից հետո հանձնաժողովի մոտ նոր հարցեր են առաջացել
Ապրիլյան հարցերով քննիչ հանձնաժողովը երեկ աշխատանքային քննարկում է արել՝ նպատակահարմար համարելով Արցախից բարձրաստիճան եւ շարքային զինվորականների հանձնաժողով հրավիրելու հարցը։ Բանն այն է, որ Սերժ Սարգսյանի հանձնաժողով այցից հետո նոր հարցեր են առաջացել, որոնք ճշգրտումների կարիք ունեն, Սարգսյանը քննիչ հանձնաժողով էր այցելել ապրիլի 16-ին։ Որոշ տեղեկություններով ապրիլի 27-ին հանձնաժողովի հերթական նիստ է նշանակված, բայց դեռեւս հայտնի չէ, թե կոնկրետ ում են հրավիրելու։ Ի դեպ, Սերժ Սարգսյանի այցից հետո հանձնաժողովի նախագահ Անդրանիկ Քոչարյանի մոտ հույս է արթնացել, որ ԶՈՒ գլխավոր շտաբի նախկին պետ Յուրի Խաչատուրովն այնուամենայնիվ կփոշմանի եւ կհամագործակցի հանձնաժողովի հետ։ Բանն այն է, որ Քոչարյանը բավական ծանր էր տարել Խաչատուրովի մերժումը եւ անգամ հայտարարեց, թե այլ միջոցներ կձեռնարկեն։ Հիմա նա հույս է հայտնել, որ Սարգսյանի այցը միգուցե իրավիճակ փոխի։ Հիշեցնենք, որ Սարգսյանից առաջ Խաչատուրովն էր հրավիրված, բայց մերժեց , ոչ պաշտոնական տեղեկություններով՝ Խաչատուրովը պատասխան-նամակում հիշեցրել էր հանձնաժողովի կարգավիճակի մասին, որ այն ընդամենը խորհրդատվական բնույթ ունի ու ինքը պարտավոր չէ ներկայանալ, իր ասելիքը վաղուց է հայտնել։
Կարծիքներ