Օրինական, բայց ոչ բարոյական
Յուրաքանչյուր մարդ իրավունք ունի հարսանիք անելու. հարսի զգեստ գնելու՝ թեկուզ 20 հազար դոլարանոց, հարյուր հազարավոր դոլարներ ծախսելու՝ շոու բիզնեսի աստղեր վարձելու համար…
Քեռակինս շնչահեղձ լինելով մտավ տուն: «20 հազար դոլարանոց հարսի շորն ի՞նչ խաբար ա: Իրենց ունեցվածքը մարդկանց աչքն են մտցնում ու նսեմացնում»: Ասում եմ. «Այ քեռակին, հանգստացիր: Կարո՞ղ է, նույնկերպ ես մտածել, երբ 1995-ին Փարիզից հարսի զգեստ էի բերել, չնայած հարսը չկար, ուղղակի չափսն էր հրապուրիչ և այդ չափսի էլ հարս պետք է ճարվեր, ինչն արեցի: 950 դոլար էի վճարել: Հիմա, գուցե, դա կարժենար 2-3 հազար դոլար: Բայց ես որտե~ղ, իշխանության սրտիկի օլիգարխը որտե~ղ:
Հավանաբար՝ դա նույն զգեստն է, ուղղակի Իլոն Մասկի SpaceX ընկերության տիեզերանավով Երկիր մոլորակի ուղեծիր դուրս բերված Հայաստանի Հանրապետության առաջին տիեզերական արբանյակով այդ զգեստը կես պտույտ է կատարելը մոլորակի շուրջ: Եթե մեկ լրիվ պտույտ կատարած լիներ, 40 հազար կգնահատվեր, երկու պտույտի դեպքում՝ 80 հազար:
Ի դեպ, քեռակնոջս մոտ, հանկարծ, չհամարձակվեք Նիկոլին վատաբանել. քանի որ այգում գործ է անում, ձեռքին կամ գերանդի է լինում կամ փոցխ. Տեղում կփոցխի ու ախ չի քաշի: Իսկ Քոչարյանի մասին ինչ ուզում եք ասեք, քանի որ նա մինչև վերջին սենթի ճշգրտությամբ գիտի, թե երկրորդ նախագահն ինչքան է «կերել»…
Առակս ինչ կցուցանե. մի ցուցադրվեք, մի գովազդվեք, ուղղակի վայելեք ձեր անձնական երջանկությունը: Երբ անձնական երջանկությունը հանրայնացվում է, այն դադարում է այդպիսին լինելուց, առավել ևս՝ այնպիսի նուրբ, խորհրդավոր իրադարձության պարագայում, ինչպիսին հարսանիքն է: Չնայած դա օրինական է, բայց բարոյական չէ՝ աղքատ, նվաստացված, կապիտուլացված և անորոշ հեռանկարով պետական կազմավորումում շքեղություններ անելն ու գովազդելը:
Գագիկ Վարդանյան
Հ.Գ. Ամեն անգամ, նման հրապարակումից հետո ստանում եմ հեռախոսազանգ մի խստաբարո գործընկերոջիցս. «Դու պետք է բացառապես տնտեսական թեմաներով գրես»: Ես հակադարձում եմ. «Եթե հուշես, թե որ երկրի տնտեսության մասին…Հանկարծ չասես, թե ՀՀ-ի ներդրումները, աշխատատեղերը, զբոսաշրջիկները зашкаливают, այնպես որ, գրելու բան չկա»:
Հ.Գ. Հարգելի լրատվամիջոցներ, մի տրվեք գայթակղությանը և մի մեկնաբանեք շքեղությունները: Օրինակ, Չինսատանում արգելված է լյուքս ապրանքների գովազդը:
Կարծիքներ