Քննչական կոմիտեն դանակահարությունների մասին սերիալ է գրում

ՀՀ Քննչական կոմիտեն` Արգիշտի Քյարամյանի գլխավորությամբ դարձել է սերիալներ գրող պրոդաքշն: ՔԿ հաղորդագրությունները գրողներին հավանաբար թվում է, թե մարդիկ սերիալի նման կարդում են իրենց բոլոր հաղորդագրությունները, համեմատում միմյանց հետ, հետեւում քրեական խրոնիկայի զարգացումներին, հիշում բոլոր նախկին «սերիաները»: Այլ կերպ հնարավոր չէ բացատրել քիչ առաջ ստացված հաղորդագրությունը, որը ՔԿ-ի «սցենարիստները» վերնագրել են. «Դանակահարության մեկ այլ դեպք Մաշտոցի պողոտայում»:
Այս հաղորդագրություն գրող անձը հաստատ կարծում է, թե իր նախկին հաղորդագրություն-սերիան բոլորը նայել-կարդացել են, հիշում են եւ հիմա անհամբերությամբ սպասում են մյուս սերիային` հաջորդ դանակահարության դեպքին եւ քանի որ իրենք էլ խոստացել են, որ «թեժ է լինելու», ուստի շարունակում են նկարագրել այդ դեպքերը եւ ըստ այդմ էլ վերնագիր են դրել: Իսկ թե նախորդիվ ինչ դանակահարության դեպք է եղել, երեւի միայն հաղորդագրություն գրողը գիտի: 

Ահա այդ հաղորդագրությունը.

Դանակահարության մեկ այլ դեպք Մաշտոցի պողոտայում, 19–ամյա երիտասարդը մահացել է․ նախաձեռնվել է քրեական վարույթ

ՀՀ քննչական կոմիտեի Երևան քաղաքի քննչական վարչության Կենտրոն և Նորք-Մարաշ վարչական շրջանների քննչական առաջին բաժնում քննություն է իրականացվում՝ հունիսի 10-ին Երևան քաղաքի Մաշտոցի պողոտայում տեղի ունեցած դանակահարության մեկ այլ դեպքի հանգամանքները պարզելու ուղղությամբ։ 2024 թվականի հունիսի 10-ին՝ ժամը 02:14-ին, ապա 02:35-ին, ահազանգեր են ստացվել այն մասին, որ կտրած–ծակած վերքերով շտապ օգնության խմբի կողմից «Հերացի» թիվ 1 հիվանդանոցային համալիր և «էրեբունի» ԲԿ են տեղափոխվել Արմնավիրի մարզի 19–ամյա և Գեղարքունիքի մարզի 24–ամյա բնակիչներ, որոնցից մեկը՝ 19–ամյա երիտասարդը, գտնվում է ծայրահեղ ծանր վիճակում։ Նույն օրը՝ ժամը 02:50-ին, հիվանդանոցային համալիրից ստացված հաղորդման համաձայն՝ մոտ ժամը 02:20-ին գրանցվել է վերջինիս կենսաբանական մահը։

Դեպքի առթիվ ՀՀ քրեական օրենսգրքի 155-րդ հոդվածի 1-ին մասի, 44-155-րդ հոդվածի 1-ին մասի, 334-րդ հոդվածի 1-ին մասի և 297-րդ հոդվածի 3-րդ մասի հատկանիշներով նախաձեռնվել է քրեական վարույթ։ Պարզվել է, հունիսի 10-ին՝ ժամը 01:10-ի սահմաններում, Երևան քաղաքի Մաշտոցի պողոտա 42 հասցեի մոտ մի խումբ անձինք, բացահայտ անհարգալից վերաբերմունք դրսևորելով հասարակության հանդեպ, վիճաբանել են միմյանց հետ, բարձրաձայն հնչեցրել սեռական բնույթի հայհոյանքներ, որի ընթացքում վիճաբանության մասնակիցներից մեկն իր մոտ գտնվող կտրող-ծակող առարկայով հարվածներ է հասցրել վիճաբանության մյուս մասնակիցներին՝ պատճառելով մարմնական վնասվածքներ:

Կատարվել է դեպքի վայրի զննություն, որի ընթացքում հայտնաբերվել և առգրավվել են արնանման հետքեր և այլ իրեր, հարցաքննվել են մի շարք անձինք, նշանակվել են դատաբժշկական փորձաքննություններ։ Ստացվել են դեպքի վայրը և դեպքը տեսանկարահանող երկու սարքերի տեսագրություններ և զննվել։ Կատարված քննչական և վարութային այլ գործողությունների, ինչպես նաև ձեռնարկված օպերատիվ-հետախուզական միջոցառումների արդյունքում պարզվել է ենթադրյալ հանցագործությունը կատարած անձի ինքնությունը, ով Սյունիքի մարզի բնակիչ է՝ ծնված 2000թ․։
Նախաքննությունը շարունակվում է: Ձեռնարկվում են անհրաժեշտ միջոցառումներ՝ վերջինիս հայտնաբերելու և վարույթն իրականացնող մարմին ներկայացնելու ուղղությամբ։

Ծանուցում. Հանցանքի համար մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով դատարանի` օրինական ուժի մեջ մտած դատավճռով:

ՀՀ քննչական կոմիտե