Սուրիկ Խաչատրյանին պատկանող առանձնատունը մինչ օրս գրանցված չէ Կադաստրում․ Սարհատ Պետրոսյան
Կադաստրի պետական կոմիտեի նախագահ Սարհատ Պետրոսյանից այսօր լրագրողները հետաքրքրվեցին, թե իր պաշտոնավարման ընթացքում եղե՞լ է թանկարժեք գույք, որը գրանցված չի եղել, բայց ինքն իմացել է այդ մասին ու բերել է օրենքի դաշտ։
«Մենք չենք, որ օրենքի դաշտ ենք բերում, համայնքը դիմում է, համայնքը պետք է իր գործիքակազմի շրջանակներում ստիպի սեփականատիրոջը, որպեսզի գույքը բերի, գրանցի»,-ասաց նա՝ նշելով, որ նման օրինակները բազմաթիվ են։
Խնդրեցինք մեկ-երկու օրինակ նշել, անուններ տալ, բայց Սարհատ Պետրոսյանը նախընտրեց անուններ չտալ։
Բայց երբ հիշեցրինք Մյասնիկյան պողոտային հարակից բլրի վրա կառուցված տան մասին, որը Սուրիկ Խաչատրյանին է պատկանում, Պետրոսյանն այստեղ չդիմացավ գայթակղությանն ու խոստովանեց․ «Լավ, եկեք չդիմանամ գայթակղությանն ու ասեմ՝ այո, դա իրականությանը համապատասխանում է, և էդ գույքը դեռևս գրանցված չի մեզ մոտ»։
Թե ի՞նչ են անում, որ գրանցվի, Պետրոսյանն ասաց, որ այդ հարցով զբաղվում է համայնքը, այս դեպքում՝ Երևանի քաղաքապետարանը, որը տեղյակ է, և ինքը կասկած չունի, որ հետամուտ է լինելու այս հարցում։
Hraparak.am-ն էլ հետաքրքրվեց Մոնումնետի հայտնի շքեղ առանձնատներով, թե նրանց դեպքում գույքահարկ մուծվո՞ւմ է և որքան, սակայն Սարհատ Պետրոսյանն այստեղ այլևս չցանկացավ «տրվել գայթակղությանը»։
«Իրենք շատ են, և ես չեմ կարող բոլորի մասին ասել։ Ես, ինչպես և նախկինում, հիմա էլ կդիմանամ գայթակղությանը և անուններ չեմ տա»,-ասաց նա։
Նրա փոխարեն մենք թվեցինք անուններ, որոնք ունեն այդ տարածքում շքեղ առանձնատներ՝ Հովիկ Աբրահամյան, Գագիկ Բեգլարյան, Կարեն Կարապետյան Վլադիմիր Գասպարյան, Վարդան Հարությունյան և այլք։ Բայց Կադաստրի կոմիտեի նախագահը, միևնույն է, այս անձանց պատկանող անշարժ գույքի մասով որևէ տվյալ չասաց՝ նշելով, որ ՀՀ Սահմանադրությամբ անձի սեփականության իրավունքը երաշխավորվում է, և ինքը չի կարող դրա վերաբերյալ տվյալներ հրապարակել։
Կարծիքներ