Ֆելիքս Ցոլակյանի պաստառներն է պատռել
Տեղատվությունից հետո ծովը ափ է նետում տիղմ, որն արևածագին փայլփլում է, շփոթեցնելով դիտողին, իսկ մայրամուտին հստակ ուրվագծվում է նրա լպրծուն, գարշահոտ բաղադրությունը: Քաղպայմանագրի՝ Շիրակի մարզին արած «ամենամեծ լավությունը», ի պատասխան շիրակցիների սիրո և հավատի, ոչ միայն Կարեն Սարուխանյանն էր, այլ մարզպետի տեղակալ Սոֆյա Հովսեփյանը: Իրականության զգացողությունը կորցնելը մի բան է, չունենալը՝ այլ բան: Պատասխանատվության զգացողությունը կորցնելը մի բան է, այն չունենալը՝ այլ բան:
Գյումրիում շրջանառվող լուրերը այս կնոջ վերաբերյալ մեկը մյուսից գունագեղ են, մեկը մյուսից անկախատեսելի: Երկու միջադեպի ականատես եմ եղել ինքս անձամբ. Մուշ թաղամասում վարձակալությամբ բնակվում է Նահապետի ընտանիքը՝ 5 անչափահասներ - 4 տղա, 1 աղջիկ և կինը: Փոքրը 6 ամսեկան է: Նահապետին ես ծանոթացա, երբ երիտասարդը վիրավորված սկսեց ինձ բացատրել, որ ինքը «բոմժ» չէ, ոչ էլ ողորմություն է խնդրում մարզպետարանից, այլ իր նման անապահով ընտանիքների համար նախատեսվածն է պահանջում: Եղել է ընդունելության մարզպետի տեղակալ Հովսեփյանի մոտ, ով ոչ ավել ոչ պակաս շպրտել է դեմքին, թե՝ 5 երեխա չէիր կարող պահել, չունենայիր: Սա դեռ ամենափոքր միջադեպն է:
Այս կինն առանց հասկանալու ի՞նչ է հուշարձանը, ինչ բարդ է Գյումրիում ներդրում անելը՝ այն վերականգնելու համար, արդեն հինգ ամիս է փորձում է վիժեցնել հուշարձանների ցանկում գտնվող Շիրակացի 201 հասցեի ներդրումային ծրագիրը: Ամենաքննարկվողը Գյումրիում այս պահին նրա մասնակցությունն է թիվ 37 դպրոցի տնօրենի պաշտոնում Աստղիկ Ավետիսյանին նշանակելու խնդրին: Քիչ աղմկահարույց չէ Ախուրյանի բժշկական կենտրոնի տնօրենի պաշտոնակատար նշանակելու և ապա հետագայում նրան մրցույթով անցկացնելու պատմությունը։
Ըստ շրջանառվող լուրերի, այս գործարքների մեջ կոռուպցիոն ռիսկեր կան: Որևէ դպրոցի, որևէ ուսուցչի, որևէ բժշկի նշանակում- ազատում առանց փոխմարզպետի չի լինում:
Ամենազավեշտալին, իհարկե, երկու օր առաջ Անի կայարանում Ֆելիքս Ցոլակյանի նախընտրական պաստառները իր ձեռքով ճղելու խայտառակ արարքն է, որին ի պատասխան և թերևս իրավացիորեն հաջորդեց շիրակցիների վրդովմունքը:
Շիրակի մարզում Ֆելիքս Ցոլակյանի համակիրների բանակը այնքան մեծ է, որ մարդն առնվազն վնասարար պետք է լինի, որ փորձի նրա դեմ հակագովազդ անել, ինչն, ըստ լուրերի, անում է Սոֆյա Հովսեփյանը:
Հասմիկ Մելքոնյան
Գյումրի
Կարծիքներ