Դրանք ունեն, հայերեն ասած, որոշակի «срок годности»

ԱԺ «Իմ քայլը» խմբակցության պատգամավոր, ԵԽԽՎ պատվիրակության անդամ Սոս Ավետիսյանից, որը, ասում են, իշխանության «սորոսական» թեւից է, երեկ փորձեցինք հետաքրքրվել, թե արդյոք Ստրասբուրգում իր եվրոպացի գործընկերների հետ քննարկում եղե՞լ է Հայաստանում ստեղծված իրավաքաղաքական վիճակի հետ կապված՝ դատարանների արգելափակում, ՍԴ նախագահի «ինքնահռչակում» եւ այլն։

Բայց Ավետիսյանը, հարցը դեռ չլսած, մեզ ուղղորդեց իրավական բլոկի պատգամավոր Վլադիմիր Վարդանյանի մոտ։

«Պարոն Մակարյան, իրավաբանական բոլոր թեմաների համար կա պարոն Վարդանյանը»,- ասաց նա՝ համառորեն փորձելով խույս տալ հարցերից, որոնք դեռ չէր լսել։

- Ես քաղաքական առումով եմ հարցնում, քանզի ԵԽԽՎ-ն քաղաքական մարմին է։

- Ես գիտեմ՝ ԵԽԽՎ-ն ինչպիսի մարմին է։ Մենք ունենք աշխատանքի բաժանում։ Ձեզ պե՞տք ա իմանաք, օրինակ, թե քաղաքական խմբերը ոնց են աշխատում, ինչի մասին է խոսքը, ինչ կար Մալթայից, որն էր էդ թեման՝ խնդրեմ։ Ձեզ պե՞տք ա հասկանալ Վենետիկի հանձնաժողովին արձագանքը, պարոն Վարդանյանը սահմանադրագետ է, ինքը կասի։

- Պարոն Ավետիսյան, ես Ձեզնից նեղ սահմանադրական կամ իրավական մեկնաբանություններ չեմ ակնկալում։

- Պարոն Մակարյան, Դուք ինձանից փորձում եք շորթել պատասխան մի ոլորտի մասին․․․

- Շորթե՞լ։ Դուք վստահ եք, որ ես Ձեզ ուզում եմ շորթե՞լ։ Իմ դեմքին նայեք, ես շորթողի նմա՞ն եմ։ Ուշադիր նայեք։

- Լավ, Դուք ինձանից ուզում եք կորզել։

- Կորզել՝ գուցե, բայց շորթելու մասով, կարծում եմ, արժե ավելի կոռեկտ գտնվել, որովհետեւ ես դեռ որեւէ մեկին շորթած չկամ, թույլ էլ չեմ տա՝ ինձ նման բան ասեն։

- Համաձայն եմ։ Ներողություն եմ խնդրում։ Դուք փորձում եք ինձ բերել մի հարցի պատասխանի, որը ես իրոք չունեմ։

- Բայց Դուք իմ հարցը չեք լսել։ Ես հարցնում էի՝ Հայաստանում ստեղծված իրավիճակի վերաբերյալ, որը քաղաքականության ու Սահմանադրության, դատական իշխանության հետ խնդիրների ծիրում է, եղե՞լ է քննարկում, զրույց ԵԽԽՎ Ձեր գործընկերների հետ։

- Եթե նկատի ունեք ԵԽԽՎ-ի ներսում, չի եղել։ Կա Վենետիկի հանձնաժողովի ասածը, դրա համար եմ ասում, որ Վլադիմիրը, որովհետեւ ինքն ա Վենետիկի հանձնաժողովի հետ խոսում, ավելի կոմպետենտ ա, ներողություն եմ խնդրում «շորթել» բառի համար, էդ հարցով, քան ես։ Եթե բերվեր լիագումար, ոնց որ, օրինակ, Մոլդովայի հարցը կարող ա գա, էդ ժամանակ պարզ ա, չէ՞, քննարկումներ կլինեն։

- Վլադիմիր Վարդանյանն ասում էր, որ ո՛չ դատական իշխանությունը պետք է միջամտի գործադիրի գործերին, ո՛չ էլ գործադիրը՝ դատականի։ Բայց վարչապետի որոշ հայտարարություններից տպավորություն է, որ գործադիրը լավ էլ միջամտում է դատական իշխանության գործերին։ 

- Ես, այնուհանդերձ, մնում եմ այն տեսակետին, որն իմ գործընկեր Վլադիմիր Վարդանյանը քիչ առաջ արտահայտեց։

- Դուք քաղաքական առումով ասեք՝ գործադիրը միջամտո՞ւմ է դատական իշխանության գործերին, թե՞ ոչ։

- Ոչ։

- Այդ դեպքում ինչպե՞ս մեկնաբանել, օրինակ, Նիկոլ Փաշինյանի այն հայտարարությունը, թե «էսօր դատավոր կա, որ վարչապետի ասածը կարա չանի՞»։ Սա միջամտությո՞ւն է, թե՞ ոչ։

- Կարելի ա անվերջ փնտրել կոնտեքստից կտրված հայտարարություններ եւ դրանցով հարցադրումներ անել։ Դրանք ունեն, ինձ թվում ա, նաեւ, հայերեն ասած, որոշակի «срок годности»․․․

- Դա այդքան էլ հայերեն չէր, իհարկե, վաղեմության ժամկետ նկատի ունեք, երեւի։

- Հա, վաղեմության ժամկետ ունեն, եւ պետք ա ըստ վաղեմության ժամկետի․․․ կարող եք անվերջ արխիվները քչփորել եւ էդ հարցերը բերել։ 

- Դա արխիվ չէ, ընդամենը վերջերս է Փաշինյանը կրկնել իր այդ հայտարարությունը։

- Էլի եմ ասում, ինձ թվում ա՝ էդ հայտարարությանը հազար ձեւով անդրադարձել են, եւ բավարար կերպով պատասխանվել ա։

- Բայց մարդկանց չեն բավարարում այդ պատասխանները։ Դատարանները շրջափակելու վարչապետի կոչը, օրինակ, գործադիրի կողմից դատական իշխանության գործերին միջամտությո՞ւն էր, թե՞ ոչ։

- Առհասարակ, բոլոր էդ հարցերին՝ դատաիրավական եւ այլն, պատասխանվել են։ Եվ կան բլոկային հարցեր, որոնց ես չեմ տիրապետում։