«Պասլատ անեիր քաղաքացուն». ասել է Արսեն Թորոսյանը

«Պասլատ անեիր քաղաքացուն». ասել է Արսեն Թորոսյանը

Առողջապահական խորhրդի նիստին, որի նախագահը նախարար Արսեն Թորոսյանն է, հունիսի 11-ին բանավեճ է տեղի ունեցել Արսեն Թորոսյանի եւ առողջապահական եւ աշխատանքի տեսչական մարմնի ղեկավար Էդգար Խուրշուդյանի միջեւ։ Նրանց հարաբերությունների լարվածությունը նկատել են անգամ ոլորտից հեռու անձինք։ Թորոսյանը վրդովված է եղել, թե ինչու է տեսչական մարմնի ղեկավարը տուգանել իր նախկին խորհրդական Վահե Տեր-Մինասյանին, իսկ երբ Էդգար Խուրշուդյանն ասել է, որ այլ բան չէր կարող անել՝ կար քաղաքացու ահազանգ, նախարարը բղավել է՝ «պասլա՛տ անեիր» այդ քաղաքացուն։ Ի դեպ, խոսքն այն մասին է, որ Վահե Տեր-Մինասյանը գարդասիլի պատվաստանյութի գովազդ է արել եթերում։ Զրուցեցինք ԱԱՏՄ պետ Էդգար Խուրշուդյանի հետ։

- Մեզ պատմեցին, որ խորհրդի երեկվա նիստը հարթ չի անցել՝ Ձեր եւ Արսեն Թորոսյանի միջեւ տհաճ խոսակցություն է եղել։ 

- Կայացած խորհրդի նիստին մենք ունեցել ենք աշխատանքային քննարկումներ, եղել են հարցեր, որոնք վերաբերել են ե՛ւ տեսչական մարմնին, ե՛ւ նախարարությանը․ ոլորտն առողջապահությունն է, երկուսս էլ առնչվում ենք։ Աշխատանքային քննարկում է եղել, հարցեր, որոնք մինչ այդ առիթ չէինք ունեցել քննարկել։ Կարող է ինչ-որ մարդկանց կողմից դա դիտվել է որպես բարձր տոներով խոսակցություն, բայց իրականում եղել է հարց-պատասխան, որոշակի դժգոհություններ, որոշակի բացատրություններ, որոշակի հիմնավորումներ, որպեսզի այդ ամեն ինչը պարզ լինի բոլորի համար։ Ինչը մինչ այդ էլ արվել էր անհատական զրույցների ժամանակ։ Նախարարի հետ էդ ամենը խոսացվել էր, ներկայացվել էր, ասվել էր։

- «Որոշակի դժգոհություն» ասելով, նկատի ունեք Թորոսյանի դժգոհությո՞ւնը, եւ Դուք փորձել եք արդարանալ։ 

- Եթե խոսում ենք արդարանալու մասին, տեսչական մարմնի ղեկավարըն արդարանալու առիթ եւ․․․

- Բացատրություն տալու․․․

- Բացատրություն տալու եւս կարիք չունի, այսպես ասած։ Եթե կան հարցեր, դա կմեկնաբանվի, հիմնավորումները կտրվեն, թե որ գործողությունն ինչ իրավական հիմքերով է կատարվել, որպեսզի թյուր կարծիք չառաջանա։ Հնարավոր է մամուլում էլ ինչ-որ կիսատ-պռատ տեղեկություններ շրջանառվեն, որ տեսչական մարմինն ինչ-որ գործողություններ է անում, որոնք իրավական հիմք չունեն։ Իրականում մենք շատ ենք խստացրել ներքին հսկողությունը, որպեսզի գործողությունները, որ արվում են, լինեն բացառապես օրենքի սահմաններում։

Բացառապես։ Սա հստակ կրկնում եմ, ու չկա որեւէ գործողություն, որի համար տեսչական մարմինը չկարողանա հիմնավորում տալ իրավական դաշտում, գործող օրենքների շրջանակում։ Այլ հարց, որ կան որոշակի օրենքներ՝ նախկինից գրված, նույնիսկ 90-ականների օրենքներ ունենք, որոնք ակտուալ չեն, որոնց պատասխանատուն իրականում մենք չենք։ Եվ նախկին խորհրդական Վահե Տեր-Մինասյանի հետ կապված էլ մենք պարզաբանումը տվել ենք, թե խնդիրն ինչ էր։ Պարոն նախարարն անընդհատ նշում էր, որ այդտեղ միտում կա, որ կոնկրետ Վահե Տեր-Մինասյանի համար է արվել եւ ինչու իր կամ այլ անձանց հանդեպ չի արվել, ովքեր եւս խոսել են տվյալ պատվաստանյութի մասին՝ տեղեկատվություն տարածել։ Հարցն այն է, որ ունեցել ենք կոնկրետ դիմում, եւ պարոն նախարարը տեղյակ է եղել, որ քաղաքացուց ունեցել ենք դիմում։ Եվ դեղերի մասին օրենքում հստակ ամրագրված կետ ունենք, որ դեղատոմսով դուրս գրվող դեղերի մասին լրատվական միջոցներով տեղեկատվություն տարածելն արգելվում է։ Խնդիրը շատ պարզ է, հստակ։ Չեմ կարծում, որ կլինի որեւէ անձնավորություն, որն այդ հաղորդաշարը դիտելուց կարողանա ասել, որ նշածս կետով խախտում չկա։

- Այսինքն ասում էր՝ ինչո՞ւ եք նկատողություն տվել։

- Տեսեք խնդիրը որն է․ եթե մենք պարոն Թորոսյանի եւ կամ ցանկացած անձի վերաբերյալ ունենանք դիմում-բողոք, որը մուտք է արվում, դրան ընթացք է տրվում։ Բոլոր բողոքներին, որոնք մեր վերահսկողական գործառույթների ներքո են, դրանց անխտիր ընթացք է տրվում։ Ես այստեղ որեւէ միտում, որեւէ անձնավորված խնդիր չեմ տեսնում։ Եվ հարցն իրականում շատ ավելի պարզ է․ եթե ունեցել ենք առաջադրանք՝ դիմում-բողոքի տեսքով, ուրեմն այն պետք է հասցնենք օրենքով նախատեսվածին, որն ավարտվել է տույժի կիրառմամբ։ Հարցն այսպես է՝ եթե մենք չենք իրականացնում մեր գործառույթը, ուրեմն թերի ենք աշխատում։

- Դուք դա՞ եք փորձել բացատրել Արսեն Թորոսյանին։

- Ես չեմ փորձել բացատրել, ես իրեն ներկայացրել եմ իրավիճակը, որ ունենք կոնկրետ դեպքի հետ կապված բողոք, եւ օրինական ընթացք է լինելու։ Առանց հաշվի առնելու, որ դա իր նախկին խորհրդականն է եղել, անկախ նրանից, որ կոլեգա է եղել։ Այսինքն՝ նման հարցերը մեզ չեն խոչընդոտելու։

- Արսեն Թորոսյանն էլ Ձեզ պատասխանել է, թե «պասլատ անեիր քաղաքացուն»։ Եղե՞լ է նման բան, ասե՞լ է։

- Այն, ինչ խոսվել է խորհրդի նիստին, մենք մոտակա օրերս մեր ֆեյսբուքյան էջում դնելու ենք խորհրդի նիստի ամբողջական արձանագրությունը։ Դրանում կետերով նշված կլինի, թե ինչ է ասվել ու քննարկվել, եւ Ձեր՝ մի քիչ կոպիտ ձեւակերպված․․․ հա․․․ ամեն դեպքում, բոլոր հարցերը, որոնք քննարկվել են նիստի ընթացքում, դրանք ամրագրելու ենք արձանագրության մեջ։

- Այսինքն՝ խոսակցությունը ոչ թե առանձին է եղել՝ ձեր միջեւ, այլ՝ նիստի շրջանակներում։

- Այո, նիստն ունի 10 մասնակից՝ խորհրդի անդամները, այդ թվում՝ հասարակական սեկտորից, որոնց ներկայությամբ խորհրդի նիստն անցել է։

- Իսկ կսղագրե՞ն «պասլատ անել» ձեւակերպումը։ Լրագրող չեն, կարող է չգրեն, բայց լրագրողական տեսանկյունից սա շատ կարեւոր է։

- Եթե այդքան հստակ դրա մասին մեսիջ ունեք, կարծում եմ՝ ավելի ճիշտ է այդ մասին բացատրությունը ստանալ պարոն Թորոսյանից։ Չեմ ուզում մեկնաբանել, որեւիցե ձեւով պատասխանել։ Մի քիչ վատ է ստացվում, որ չեմ պատասխանում, բայց արձանագրության մեջ արձանագրված են լինելու թեմաները, ինչի մասին խոսվել է այնտեղ։

- Այսինքն՝ «պասլատ»-ի մասը չեք հերքում։

- Այսպես ասեմ՝ այդ գաղափարը պետական մարմնի ղեկավարի մակարդակով հարիր էլ չէ որեւէ մեկնաբանություն տալ։

- Առհասարակ, քաղաքացիների աջակցությամբ, հեղափոխությամբ իշխանության եկածներին նման արտահայտությունները հարիր չեն։

- Հեղափոխություն է եղել, ավարտվել։ Հիմա էդ գործընթացը հիմնավորում ենք, արմատներն ենք գցում ու պետք է փորձենք էնպես անել, որպեսզի հստակ տարբերվենք, հստակ ցույց տանք մեր աշխատանքի արդյունավետությունը։ Ինքս դրա կողմնակիցն եմ։

- Կարելի՞ է ասել, որ Թորոսյանի հետ կոնֆլիկտ ունեք, եւ դա տեւական է, քրոնիկ։

- Եթե կոնֆլիկտը ձեւակերպենք շատ չակերտների մեջ, ապա այսպես ներկայացնեմ իրավիճակը․ տեսչական մարմինները քանի որ առանձին մարմիններ են, նախարարության հետ կապ չունենք, փաստացի այնպես է դրվածքը, այնպես է ստացվել, որ մենք վերահսկում ենք նախարարության որոշակի գործառույթներ։ Իհարկե՝ ոչ բոլոր, եւ այդ «կոնֆլիկտը» նույնիսկ ողջունելի է, որովհետեւ նախարարությունը գործում է առանձին, մենք՝ առանձին՝ օրենքների ու մեր հնարավորությունների, կանոնադրության սահմանում։ Եթե որոշակի հարցերի հետ կապված կա հակադրություն, դա շատ նորմալ եմ համարում։ Ճիշտ է՝ իմ անձնականից ելնելով էլ չեմ կարող էդ ամեն ինչին ըտենց էմոցիոնալ ընթացք տալ, ես աշխատում եմ շատ ավելի կոռեկտ, շատ ավելի հավաքված, եթե խնդիրներ կան, փորձում եմ այդ հարցերը լուծել անձնական շփումների ընթացքում։ Չհանրայնացնել, քանի որ խոսքը 2 պետական մարմինների մասին է։ Հանրայնացումը բացարձակ չի կաշկանդում, ուղղակի Դուք էլ որոշակի մեջբերումներ եք անում, որն այնքան էլ ցանկալի չէ։

- Իսկ Դուք Արսեն Թորոսյանի ազատած կադրերին Ձեզ մոտ աշխատանքի հրավիրո՞ւմ եք, եղե՞լ են դեպքեր։

- Եղել են դեպքեր ու հնարավոր է՝ էլի լինեն դեպքեր։ Եվ եղել են հակառակ դեպքերը, երբ իմ ազատած կադրերը հրավիրվել են իր կողմից։ Հարցը կրկին շատ պարզ է․ եթե ես գտնում եմ, որ Արսեն Թորոսյանի ազատած կադրը կարող է օգուտ բերել տեսչական մարմնին, ուրեմն նա օգուտ է բերելու տեսչական մարմնին՝ իմ խաղի պայմաններով։ Այսինքն՝ այն իրավիճակում, որը մենք ստացել ենք հեղափոխությունից հետո։ Եվ կարծում եմ՝ նույն տրամաբանությամբ էլ շարժվել է պարոն Թորոսյանը։

- Կարծում եք՝ հասարակությունը ձեր այդ չակերտավոր կոնֆլիկտից շահո՞ւմ է։

- Ես ընդհանրապես կոնֆլիկտների կողմնակից չեմ։ Բայց եթե «կոնֆլիկտն» առաջանում է, ուրեմն իրեն պետք է լուծում տալ։