Ռոբերտ Քոչարյանն այսօրվա նիստին չի մասնակցում. պաշտպանները դատարանին ինքնաբացարկ են ներկայացնելու

Երևանի ընդհանուր իրավասության կենտրոնի նստավայրում մեկնարկեց ՀՀ երկրորդ նախագահ Ռոբերտ Քոչարյանի գործով դատական նիստը: Գործը մակագրվել է դատավոր Արթուր Մկրտչյանին:

Նշենք, որ օրեր առաջ Քոչարյանին գրավով ազատ արձակելու միջնորդության քննության ժամանակ քննիչը և դատախազը ինքնաբացարկի միջնորդություն էին ներկայացրել նաև դատավոր Նելլի Բաղդասարյանին, և վերջինս միջնորդությունը բավարարել էր: Որից հետո գործը մակագրվել էր մեկ այլ դատավորի՝ Դավիթ Գրիգորյանին։ Վերջինս ինքնաբացարկ էր հայտնել՝ պատճառաբանելով, թե ինքը հերթապահ չի եղել, սակայն գործն իրեն է մակագրվել։ Այսօրվա նիստին, ինչպես լրագրողներին հայտնեց փաստաբան Արամ Օրբելյանը, իրենք պատրաստվում են դատարանին ինքնաբացարկ ներկայացնել, պատճառները կնշի նիստի ավարտին:

Պաշտպանը նաև տեղեկացրեց, որ Ռոբերտ Քոչարյանն այսօրվա նիստին չի մասնակցի: Ամենայն հավանականությամբ դատարանը այսօրվա երկու գլխավոր միջնորդություններին չի անդրադառնա:

Նշենք, որ Քոչարյանի պաշտպանները նրա նկատմամբ գրավ կիրառելու միջնորդությունը ներկայացրել են դեռևս 2018 թվականի դեկտեմբերի 26-ին։ Արդեն 2019-ի հունվարի 10-ին էլ դատարան է մուտքագրվել նաև Քոչարյանի կալանքի ժամկետը երկարացնելու վերաբերյալ Հատուկ քննչական ծառայության միջնորդությունը: Այս երկու միջնորդությունները կքննեն մեկ վարույթում։

Հիշեցնենք, ՀՀ 2-րդ նախագահ Ռոբերտ Քոչարյանը հուլիսի 26-ին Հատուկ քննչական ծառայություն էր ներկայացել «Մարտի 1»-ի գործով վկայի կարգավիճակով՝ հարցաքննության։ Նույն օրը նրան մեղադրանք էր առաջադրվել ՀՀ քրեական օրենսգրքի 300.1-ին հոդվածի 1-ին մասով՝ Սահմանադրական կարգը տապալելը։ Նա հուլիսին կալանավորվեց, ապա օգոստոսի 13-ին ազատ արձակվեց Վերաքննիչ դատարանից։ Ռոբերտ Քոչարյանը, սակայն, ազատության մեջ երկար չմնաց, դեկտեմբերի 7-ին դատարանը՝ նախագահությամբ դատավոր Ռուբիկ Մխիթարյանի, որոշմամբ նա կալանավորվեց: