Պուտինի նախկին «ախրանիկը»՝ ՌԴ ապագա նախագա՞հ

Ռուսաստանի Պետխորհրդի քարտուղար է նշանակվել ՌԴ նախագահ Վլադիմիր Պուտինի անվտանգության նախկին աշխատակից և Տուլայի նախկին նահանգապետ Ալեքսեյ Դյումինը։ Այս մասին հայտնում է Կրեմլի մամուլի ծառայությունը։
Երդմնակալությունից հետո Պուտինը Դյումինին նշանակեց իր օգնական։ Դմիտրի Պեսկովի խոսքով, Դյումինը կզբաղվի պաշտպանական արդյունաբերության և Պետական ​​խորհրդի հարցերով, ինչպես նաև «կհամակարգի սպորտին առնչվող հարցերը նախագահի աշխատակազմում»: 

Նախկինում Ալեքսեյ Դյումինը ծառայել է նախագահի անվտանգության ծառայությունում։

Քաղաքագետ Սերգեյ Մարկովը գրում է, որ ռուսական վերնախավն անհանգստացած է Դյումինի՝ Պետական ​​խորհրդի քարտուղարի պաշտոնում նշանակվելուց։ Սա համարվում է հաստատում, որ Դյումինը Պուտինի ընտրությունն է ապագա նախագահական պաշտոնում։

«Նման խոսակցությունները վաղուց էին պտտվում։ Դյումինը գալիս է Պուտինի անվտանգության աշխատակցի, ինչպես նաև գաղտնի ծառայության սպայի փորձառությամբ: Այնուհետև նա հաջողությամբ ապացուցեց իրեն որպես Տուլայի նահանգապետ: Եվ հիմա, որպես Պետխորհրդի քարտուղար, Դյումինը կղեկավարի Ռուսաստանի գլխավոր էլիտան դաշնային մակարդակով: Նոր Սահմանադրությամբ Պետական ​​խորհուրդը կարող է հավաքական նախագահի դեր կատարել։ Սա այն է, ինչը, շատերի կարծիքով, հաստատում է այն միտքը, որ Պուտինը Դյումինին տեսնում է որպես Ռուսաստանի ապագա նախագահ»,- գրել է Մարկովը Telegram-ի իր ալիքում։