«Մտահոգիչ է նաև այն փաստը, որ անցյալ տարվա ապրիլին պատմության մեջ առաջին անգամ ստեղծվեց համագործակցության մի շատ տարօրինակ հարթակ՝ Ամերիկա, Եվրամիություն և Հայաստան»:
Այս մասին տեղական ԶԼՄ-ներին տված հարցազրույցում բարբաջել է Ադրբեջանի նախագահ Իլհամ Ալիևը:
«Ինչպես գիտեք, Բրյուսելում հանդիպել են ԱՄՆ-ի պետքարտուղարը, Եվրահանձնաժողովի նախագահը, արտաքին գործերի նախարարը և Հայաստանի վարչապետը և փաստացի պայմանավորվածություն ձեռք բերել նոր համագործակցության վերաբերյալ։
Մեր ունեցած տեղեկություններով, մինչ այս հանդիպումը ձեռք բերված պայմանավորվածության մեջ եղել է ռազմական բաղադրիչ, որն այն ժամանակ պաշտոնապես բացառվել է, բայց դե ֆակտո շարունակում է մնալ։ Սա փաստացիորեն բացառեց և՛ Եվրոպական հանձնաժողովին, և՛ Ամերիկայի Միացյալ Նահանգներին Ադրբեջանի և Հայաստանի միջև հարաբերությունների կարգավորման գործընթացից։
Այս մասին նրանց արդեն տեղեկացրել ենք։ Եթե կողմերից որևէ մեկը նախընտրի որևէ կողմին, չի կարող լինել ազնիվ միջնորդ: Այդ պատճառով անցյալ ամիս Ամերիկայի պետքարտուղարի խնդրանքը մնաց օդում կախված, և Ադրբեջանը չհամաձայնեց եռակողմ հանդիպմանը։
Մասնավորապես, ինչպես գիտեք, Բրյուսելում բազմաթիվ հանդիպումներ են տեղի ունեցել ԵՄ խորհրդի նախագահի նախաձեռնությամբ։ Սա էլ արդեն ավարտվել է։ Այսինքն՝ մենք կողմ ենք երկկողմ բանակցությունների ձեւաչափին, եւ, բնականաբար, Ադրբեջանը՝ որպես այս հարցում կողմ, կպաշտպանի իր դիրքորոշումը»,-պնդել է Ալիևը։
