Արարատ Միրզոյանը բյուջեի հաշվին շքեղ նորոգել է իր կառավարական ամառանոցը

Արարատ Միրզոյանը բյուջեի հաշվին շքեղ նորոգել է իր կառավարական ամառանոցը
Արարատ Միրզոյան


Մայիսի 15-ից ԱԺ նախագահ Արարատ Միրզոյանն ընտանյոք հանդերձ տեղափոխվել է կառավարական ամառանոց։ Ինչպես ասում են՝ նրանք էլ վերջնականապես համալրեցին ազնվականների ու էլիտարների շարքերը։ Բայց որպեսզի ԱԺ խոսնակն ու իր ընտանիքն իրենց ռեզիդենցիայում ապրեն բարձրաշխարհիկներին վայել թագավորական պայմաններում, դրա համար մի քանի ամիս շարունակ վերանորոգում էին նրանց բնակարանը։ Բնականաբար՝ պետբյուջեի հաշվին, քանզի հեղափոխությունից առաջ ՔՊ ներկայացուցիչներից մեկի հարցումին պատասխանելիս Միրզոյանն ասել էր՝ ոչ մի տեղ չեմ աշխատում, ուստի անգամ մեծ ցանկության դեպքում չէր կարող սեփական գրպանից գումար հատկացնել ամենահասարակ կոսմետիկ վերանորոգման համար անգամ, ինչպես արել է, օրինակ, ԱԱԾ տնօրեն Արթուր Վանեցյանը՝ սեփական միջոցներով նորոգելով իրեն հատկացված առանձնատունը։ Իշխանական աղբյուրները մեզ հաղորդեցին, որ Արարատ Միրզոյանն իր բնակարանի նորոգման վրա խոշոր՝ «աստղաբաշխական թվերի» հասնող գումար է ծախսել։

Որպեսզի պարզեինք, թե որքանով է այդ տեղեկությունը հավաստի, գուցե հորինվա՞ծ է Միրզոյանի թշնամիների կողմից, դիմեցինք Կոնդի առանձնատների տնտեսության ՊՈԱԿ-ի տնօրեն Արեգ Սավգուլյանին՝ ճշտելու, թե պետբյուջեից որքան գումար է ծախսվել Միրզոյանին հատկացված առանձնատան նորոգման վրա։ Սավգուլյանը, սակայն, թիվ չասաց՝ հպարտորեն հայտարարեց, որ դա համարվում է պետական գաղտնիք պարունակող տեղեկություն, որը չի կարող հրապարակել։ Ասաց, որ դա ամրագրված է «Գնումների մասին» օրենքով։ Կարճ ասած՝ կառավարությունը գաղտնի է պահում ԱԺ նախագահի տան նորոգման ծախսերը, որը հոգում ենք մենք՝ հարկատուներս՝ հղում անելով «Գնումների մասին» օրենքին։

Այդ օրենքի 15-րդ հոդվածի 2-րդ կետն ասում է․ «Պետական գաղտնիք պարունակող գնումների պլանում ներառվում են ազգային անվտանգության ապահովման, «Հատուկ պետական պաշտպանության ենթակա անձանց անվտանգության ապահովման մասին» Հայաստանի Հանրապետության օրենքի 5-րդ հոդվածի 2-րդ մասով նախատեսված՝ պաշտոնատար անձանց արարողակարգային ծախսերի, կեցության, սննդի եւ տրանսպորտային սպասարկման, ներառյալ՝ տրանսպորտային միջոցների տեխնիկական սպասարկման եւ նորոգման ոլորտում հատուկ տեխնիկական եւ ծրագրային, ռազմական տեխնիկայի, սպառազինության, ռազմամթերքի եւ ռազմատեխնիկական միջոցների ապահովման համար անհրաժեշտ ապրանքները, աշխատանքները եւ ծառայությունները»։

Այս օրենսդրական փոփոխությունն արվեց 2016 թվականի դեկտեմբերին՝ նոր իշխանությունների կողմից խորապես մերժված նախկին իշխանությունների օրոք։ Եվ այն ժամանակ այսօրվա իշխանավորները, որ ընդդիմադիրի կարգավիճակ ունեին, կուրծք էին ծեծում, թե ինչու է կառավարությունն ուզում գաղտնի պահել այդ կարեւորագույն տեղեկությունները, ինչու թափանցիկ ու բաց չի աշխատում, չի տեղեկացնում հանրությանը, թե բարձրաստիճանների վրա պետբյուջեից ինչ են ծախսում, ինչքան։ Այդ օրենսդրական փոփոխությունն այն ժամանակ պետական դավաճանությանը համազոր քայլ դիտվեց՝ դավադրություն սեփական ժողովրդի հանդեպ։ Բազում հրապարակումներ եղան, ապարդյուն՝ իշխանությունն այդ փոփոխությունն անցկացրեց։
Հիմա հարց է ծագում՝ անգամ եթե կա նման օրենսդրական սողանցք, որը թույլ է տալիս չհրապարակել պետական պահպանության ենթակա անձանց վրա կատարվող պետական ծախսերը, այնուամենայնիվ, «ժողովրդի իշխանությունները» կարող են հրապարակել եւ բավարարել հանրային հետաքրքրությունը։ Իսկ եթե այդ օրենքի կետը խոչընդոտ է ինչ-որ կառավարիչների համար, որ մերժեն լրագրողական հարցումները, կարող են օրենսդրական փոփոխություն կատարել եւ հանել այդ դրույթը, որը 2016-ին դավադրաբար ներմուծել են հանրապետականները։ Հակառակ դեպքում կարող ենք պնդել, որ այս մի գծով նույնպես ՀՀԿ-ի համար «կարված կոստյումը» հարմար է եկել ՔՊ-ի եւ երիտասարդ իշխանավորների վրա, եւ նրանք մտադիր չեն հրաժարվել դրանից։

Իսկ հանրության հարկերով սնվող պաշտոնյաներին հանրությունն իրավունք ունի հարցնել, թե ինչի վրա ես ծախսում իմ տված գումարները՝ քեզ հաճելի անձանց հետ արտերկրում վոյաժների՞, թե՞ ջակուզիների ու ոսկեզօծ վերանորոգման։
Կարո՞ղ ենք մենք եւս «օդում կախված լուրերին» հղում անելով ենթադրել, որ այն մարդիկ, ովքեր նախկիններին մեղադրում էին բյուջեն մսխելու, թալանելու մեջ, հիմա էլ իրենք են բյուջեն թալանում՝ սրբի կերպարանք եւ անմեղ դեմք ընդունած։