Սերգո Կարապետյանի ճակատագիրը՝ քրգործով, ինձ քիչ է հետաքրքրում․ Շարմազանով

Սերգո Կարապետյանի ճակատագիրը՝ քրգործով, ինձ քիչ է հետաքրքրում․ Շարմազանով

Երեկ ՀՔԾ-ն Սերժ Սարգսյանի նկատմամբ հարուցված քրեական գործի վերաբերյալ հաղորդագրություն տարածեց, և պարզ դարձավ, որ առանձնապես խոշոր չափերով յուրացման մեղադրանք է առաջադրվել ոչ միայն ՀՀ երրորդ նախագահին, այլեւ գյուղատնտեսության նախկին նախարար Սերգո Կարապետյանին, նրա տեղակալ Սամվել Գալստյանին ու նույն նախարարության բուսաբուծության վարչության պետ Գևորգ Հարությունյանին։ Մենք գրել էինք, որ Սերգո Կարապետյանը  ցուցմունք էր տվել Սերժ Սարգսյանի դեմ, և մեզ առերեսումից մանրամասներ էին հայտնի դարձել։ Մասնավորապես, որ ողջ առերեսման ժամանակ Սերգո Կարապետյանը բացառապես իր ոտքերին է նայել, այլ ոչ թե Սերժ Սարգսյանին, ով նրան հարցրել է. «Սերգո, ես նման բան քեզ ասե՞լ եմ»: Հիշեցնենք, խոսքն այն մասին է, որ․ նախկին գյուղնախարարը ցուցմունք է տվել, որ Սերժ Սարգսյանի ցուցումով է գյուղերին դիզվառելիք տրամադրելու տենդերը տվել նախագահի ընկերոջը՝ Ֆլեշի Բարսեղին, չնայած ավելի ցածր գին առաջարկող է եղել։ Սերգո Կարապետյանը պատասխանել է․ «Պարոն նախագահ, ես հավատացյալ, ազնիվ մարդ եմ, ես սուտ չեմ կարող ասել»: «Բա որ հավատացյալ մարդ ես, ինչո՞ւ ես իմ ապօրինի հրահանգը կատարել և պետությանը վնաս պատճառել, Սերգո»,- հարցրել է Սերժ Սարգսյանն ու հայհոյել:

ՀՀԿ խոսնակ Էդուարդ Շարմազանովին երեկ հարցրինք, թե Սերժ Սարգսյանի գործի հետագա քննության վրա ի՞նչ ազդեցություն կարող է ունենալ Սերգո Կարապետյանին որպես մեղադրյալ ներգրավելը․ «Հայաստանի հանարապետական կուսակցությունը Սերժ Սարգսյանի դեմ սարքված, կարված, շինծու քրեական գործի վերաբերյալ պաշտոնական հայտարարությամբ հանդես է եկել դեռ շաբաթներ առաջ, և բազմաթիվ առիթներով նշել եմ իմ կարծիքը՝․ սա համարում եմ քաղաքական դրդապատճառներով կարված, սարքված, շինծու քրեական գործ՝ ուղղված ՀՀ 3-րդ նախագահ Սերժ Սարգսյանի դեմ։ Ես ավելացնելու բան չունեմ, սա շինծու, խայտառակ քրեական գործ է, որի պատվիրատուն օրվա իշխանություններն են»,- պատասխանեց Շարմազանովը։

Բայց ինչո՞ւ է մեղադրանք առաջադրվել Սերգո Կարապետյանին՝ հարցրինք Շարմազանովին, չէ՞ որ նա Սերժ Սարգսյանի դեմ ցուցմունք էր տվել, իսկ անցյալում իշխանության «թիրախների» դեմ ցուցմունք տվողներին ազատում էին պատասխանատվությունը, նա պատասխանեց․

«Դա իրենց խնդիրն է՝ մեղադրանք կառաջադրե՞ն, թե՞ ոչ, ես կոնկրետ ասում եմ՝ նրա վերաբերյալ ինչ կա կուսակցությունը տվել է հստակ հայտարարություն, շատ ավելի վատ, որ Սերգո Կարապետյանն է ցուցմունք տվել, ես դա գնահատում եմ, որպես շինծու քրեական գործ, որպես կլյաուզա  և որպես քաղաքական հետապնդում։ Սերգո Կարապետյանի ճակատագիրը՝  քրեական գործով վկա՞ կլինի, թե՞ մեղադրյալ կլինի, դա ինձ քիչ է հետաքրքրում»։