Հայթաղում տնօրեն են ընտրելու
2017 թվականին տեղի ունեցած խորհրդարանական ընտրություններից առաջ Արմավիրի մարզի Հայթաղ գյուղի ղեկավար Սամվել Վարդանյանը, որն արդեն նախկին է, դպրոցի տնօրեն Ռուզաննա Գաբրիելյանից պահանջել է աշխատել ՀՀԿ-ի օգտին: Տնօրենը մերժել է՝ «ես ձայն հավաքող չեմ» ասելով:
Տնօրենի պատասխանը դուր չի եկել Սամվել Վարդանյանին: Նա կուլ չի տվել կնոջ վիրավորանքը, վրեժխնդիր լինելու հարմար պահի է սպասել:
Բայց, ինչպես ասում են՝ շաբաթն ուրբաթից շուտ է եկել. թավշյա հեղափոխությունը խառնել է Վարդանյանի պլանները: Գրիգորյանների ընտանիքի հովանավորչությունը վայելող Վարդանյանը, հասկանալով, որ կորցրել է տանիքը, ինքնակամ հրաժարվել է համայնքի ղեկավարի պաշտոնից եւ ամեն ինչ արել, որ այդ մանդատն անցնի իր տեղակալ Մերուժան Մուրադյանին:
Հիմա, երբ Սամվել Վարդանյանը դպրոցի տնօրենից վրեժխնդիր լինելու որեւէ լծակ չունի, հայթաղցիների ասելով՝ փորձում է հարցերը լուծել գործող գյուղապետ Մուրադյանի միջոցով: Ցանկանում է ազատվել «հանդուգն» տնօրենից եւ դպրոցի ղեկավարումը հանձնել իր կնոջը: Բանն այն է, որ տնօրեն Ռուզաննա Գաբրիելյանի պաշտոնավարման 5-ամյա ժամկետը լրացել է, իսկ տնօրենի տեղի համար մրցույթին հաշված օրեր են մնացել:
Դեկտեմբերի 25-ին կայանալիք մրցույթին, բացի Ռուզաննա Գաբրիելյանից, հայտ է ներկայացրել նաեւ նախկին գյուղապետ Սամվել Վարդանյանի կինը՝ Կարինե Մակարյանը:
Միջանկյալ նշենք, որ երկու տարի առաջ Կարինե Մակարյանը մասնակցել է նաեւ Փարաքարի միավորված դպրոցի տնօրենի մրցույթին՝ հարուցելով փարաքարցիների զայրույթը: Նրանցից շատերը նույնիսկ մարզպետարան էին գնացել եւ ասել՝ եթե Մակարյանն ընտրվի, իրենք երեխաներին այլ դպրոցներ կտեղափոխեն:
Գրեթե նույն վիճակում է հայտնվել Հայթաղը: «Երբ իմ պաշտոնավարման ժամկետն ավարտվում էր, հավաքեցի ուսուցիչներին, ասացի՝ եթե ուզում եք շարունակենք միասին աշխատել, կառաջադրվեմ, եթե ոչ՝ խնդիր չկա: Բոլորը միաձայն էին, որ շարունակեմ ղեկավարել: Շատ նորմալ է, որ Կարինե Մակարյանն էլ է առաջադրվել: Պարզապես ճիշտ չէ, որ նրա ամուսինը տնետուն ընկած՝ իր կնոջ օգտին ստորագրություններ է հավաքում եւ հանիրավի սրում գյուղի մթնոլորտը: Ի վերջո, տնօրենին ընտրելու է դպրոցի կառավարման խորհուրդը: Ի՞նչ կապ ունեն գյուղացիները, որոնց մեջ պառակտում են գցում»,- ասաց Ռուզաննա Գաբրիելյանը:
Կառավարման խորհրդի ութ հոգանոց անդամներից մեկն էլ Հայթաղի գործող ղեկավար Մերուժան Մուրադյանն է: Գյուղում լուրեր են տարածվել, թե Մուրադյանը դպրոցի տնօրենին փոխելու ցուցում ունի Արմավիրի մարզպետից: «Ես՝ ուր, մարզպետը՝ ուր: Ես ո՛չ մարզպետ եմ տեսել, ո՛չ էլ ցուցումներ ու «դաբրոներ» ստացել: Սուտ խոսակցություններ են»,- հերքեց Հայթաղի նորընտիր ղեկավարը:
Մերուժան Մուրադյանը նախկին կոմունիստ է, ՔՊ անդամ դառնալու հայտ է ներկայացրել, բայց դեռ պատասխան չունի: Ասում է՝ աստվածավախ մարդ եմ, առաջնորդվում եմ Քրիստոսի ուսմունքով: «Ամեն ինչ անելու եմ գյուղի կյանքը բարելավելու համար: Իսկ դպրոցի տնօրենի ընտրությանը կմասնակցեմ խղճիս ձայնով»:
Կարծիքներ