Եղել են դեպքեր, որ ես ևս եղել եմ կոշիկով խփող ընդդիմություն

Ազգային ժողովի ձեւավորումից հետո շուտով սպասվում է երկրի թերեւս երկրորդ ամենակարեւոր քաղաքական իրադարձությունը՝ նոր կառավարության ձեւավորումը։ Այն ուղեկցվելու է կառավարության կառուցվածքի եւ կազմի փոփոխությամբ, գերատեսչությունների կրճատմամբ եւ օպտիմալացմամբ։ Կոալիցիաների մեծ փորձ ունեցող ԲՀԿ պատգամավորներից Նաիրա Զոհրաբյանից հետաքրքրվեցինք՝ հնարավո՞ր է իրենց ներկայացվածությունն ապագա կառավարությունում։
«Նման քննարկումներ մեր խմբակցությունում չեն եղել, ես այս պահին չեմ կարող ասել, ես կարող եմ ասել, որ նման օրակարգ չկա, եւ նման քննարկումներ չեն եղել»,- ասաց տիկին Զոհրաբյանը։

- Այդուամենայնիվ, ի՞նչը կարող է նպաստել, որ դուք կոալիցիա կազմեք նոր իշխանության հետ կամ հուշագիր ստորագրեք, եւ ի՞նչը կարող է խանգարել դրան։

- Ես պատրաստ չեմ Ձեր հարցին պատասխանել, որովհետեւ մեր խմբակցությունում նման քննարկումներ չեն եղել։ Եթե նման քննարկումներ չեն եղել, ես որոշել եմ այսուհետ ձեռնպահ մնալ իմ անձնական տեսակետը հայտնելուց։ 

- Բայց մեզ Ձեր անձնական տեսակետը նոմինալ առումով հետաքրքիր է։

- Իմ անձնական տեսակետով՝ ես կարծում եմ, որ մենք շատ ճիշտ դիրքավորվել ենք քաղաքական դաշտում՝ որպես ընդդիմություն։

- Ձեզ միշտ քննադատել են՝ որպես ընդդիմություն, որ դուք միշտ ինչ-որ կիսակոալիցիոն ընդդիմություն եք եղել, կառուցողական եք եղել, այլընտրանք, բայց ոչ ռադիկալ ընդդիմություն։

- Եթե ռադիկալ ընդդիմություն համարում են էն ընդդիմությանը, որը կոշիկը պիտի հանի եւ կոշիկով հարվածի իշխանության գլխին, ապա ես՝ ինքս, նման տեսակի ընդդիմությանը դեմ եմ։ Եթե մենք կտեսնենք, որ իշխանությունն անում է սխալ քայլեր, էդ ժամանակ կտեսնեք, թե որն է լինում կոշտ ընդդիմություն։

- Օրինակ՝ Նիկոլ Փաշինյանն ինչպիսի՞ ընդդիմություն էր։

- Նիկոլ Փաշինյանը բավականին սուր եւ արմատական ընդդիմություն էր։

- Կոշիկով խփո՞ղ ընդդիմություն էր։

- Եղել են դեպքեր, որ ես եւս եղել եմ կոշիկով խփող ընդդիմություն։ Ցանկացած փուլում, այո, իշխանությանը նաեւ որակական ընդդիմություն է պետք։ Միգուցե նախորդ իշխանության դեպքում պետք էր լինել, այո, էդպես շատ սուր, արմատական ընդդիմություն։

- Ընդունո՞ւմ եք, որ նախկինում կարող էիք լինել ավելի սուր, արմատական ընդդիմություն, ինչը չարեցիք, փոխարենը արեց Նիկոլ Փաշինյանը։

- Ես չեմ ասում, ասում եմ՝ նախորդ իշխանության ժամանակ մենք շատ դեպքերում եւ ես՝ ինքս անձնապես, եղել եմ շատ կոշտ, արմատական ընդդիմություն։ Հիմա, եթե կտեսնենք, որ սխալ քայլեր են անում, այսինքն՝ շեղվում են իրենց հռչակած ուղուց, բնականաբար, մենք կլինենք ամենասուր եւ արմատական քննադատողը։ Եվ ոչ միայն կքննադատենք, այլ նաեւ մենք կառաջարկենք ալտերնատիվ տարբերակ, որ, ահա, սա է ճիշտ տարբերակը, որից շեղվել եք։

- Այսինքն՝ կարող է առաջ քաշվել նաեւ իշխանափոխությա՞ն հարց։

- Գիտե՞ք, եկեք հիմա Կիկոսի մահը չսարքենք, մեր օրակարգում նման հարց չկա։

- Պարզապես նախկինում, թեեւ բոլորդ էլ ձեր չափով ընդդիմանում էիք, բայց Նիկոլ Փաշինյանը եղավ այն ռադիկալ ընդդիմությունը, որը կարողացավ իշխանափոխություն անել։ Հիմա գուցե այս իշխանությունն էլ է սխալներ թույլ տալիս, բա չունենա՞նք այնպիսի ընդդիմություն, որը հետո իշխանափոխություն կանի։

- Ուրեմն երբ որ սխալներ թույլ կտան, էդ ժամանակ էդ քայլերին կանդրադառնանք։ Հիմա կանխորոշել, թե ինչ կանի ընդդիմությունը Կիկոսի մահով, ես ասել եմ՝ քաղաքականության մեջ «Կիկոսի մահն» իմ ամենաչսիրած ժանրն է։

- Բայց ընդունո՞ւմ եք, որ Փաշինյանն ու նրա թիմակիցներն ավելի ճիշտ եւ ուժեղ ընդդիմություն էին, քան դուք եւ մյուսները։

- Թող գնահատականը տա ժողովուրդը, ես չեմ կարող ժողովրդի փոխարեն որեւէ գնահատական տալ։