Ամենայն հավանականությամբ, գլխավոր դատախազությունը կբողոքարկի Քոչարյանի վերաբերյալ որոշումը

Դատավոր Դավիթ Գրիգորյանի որոշմամբ՝ երկրորդ նախագահ Ռոբերտ Քոչարյանն Արցախի նախկին եւ ներկայիս նախագահներ Արկադի Ղուկասյանի եւ Բակո Սահակյանի անձնական երաշխավորությամբ ազատ արձակվեցին: Այս որոշման դեմ տասնյակ քաղաքացիներ ընդվզեցին եւ այժմ փակել են Գայի պողոտան՝ երթով շարժվելով Ազատության հրապարակ:

Քիչ առաջ ԱԱԾ մեկուսարանից դուրս է եկել Քոչարյանը: ԱԱԾ-ի դիմաց լրագրողների հետ զրույցում նրա պաշտպաններից Հայկ Ալումյանն ասել է, որ դատախազությունն այս որոշումը չի կարող բողոքարկել: Ալումյանի հայտարարության վերաբերյալ պարզաբանում խնդրեցինք գլխավոր դատախազությունից:

Գլխավոր դատախազության հանրային կապերի վարչության պետ Արեւիկ Խաչատրյանը մեզ փոխանցեց․ «Ակտը կստանանք, վերջնական կորոշվի, սակայն ելնելով նախնական կալանքի անհրաժեշտության վերաբերյալ մեր արդեն իսկ արտահայտված դիրքորոշումից, ըստ ամենայնի կբողոքարկվի»:

Հիշեցնենք, որ երկրորդ նախագահին մեղադրանք է առաջադրվել «Մարտի 1»-ի գործով սահմանադրական կարգը տապալելու, ինչպես նաեւ խոշոր չափի կաշառք ստանալու մեջ: