Բարսեղյանը քանդակել գիտի, եկեղեցին սնանկ է, կառավարությունից էլ կես մլրդ են ակնկալում. Գյումրու ավագանու հերթական նիստը

Այսօր Գյումրու ավագանին քննարկման  դրեց եւ հաստատեց  օրակարգային  2 տասնյակից ավել հարցեր: Նիստի մեկնարկին քաղաքապետ Սամվել Բալասանյանը հասցրեց հպարտանալ՝ հիշեցնելով, որ 2018 թ-ին այնքան լավ են աշխատել, որ 700միլիոն դրամի պարտք են մարել: Ավագանու այսօրվա նիստը նույնպես աչքի ընկավ առատ նվիրատվություններով. այս կամ այն անհատին ու կազմակերպությանը տարբեր նպատակներով  համայնքի բյուջեից  կլորիկ գումարներ հատկացվեցին:

Ուշագրավը  «Կումայրի պատմամշակութային արգելոց-թանգարան»  ՀՈԱԿ-ին  գույք ձեռք բերելու եւ տարածքը վերանորոգելու համար հատկացվող 11 մլն 500 հազար  դրամ հատկացնելն էր: Այս գումարը հատկացվեց Բուլվարային թաղամասի վերանորոգման հաշվին, որի համար 60մլն դրամ էր նախատեսված: Ընդհանուր հաշվարկով համայնքի շուրջ 23կազմակերպությունների  տրամադրվեց  20 մլն 850 հազար դրամ: Քանդակագործ Զավեն Կոշտոյանի հիշատակը հավերժացնող պատկերագրքի տպագրման ծախսերը  հոգալու  համար հատկացվող գումարին հատկապես  դեմ չէր ԳԱԼԱ խմբակցության ավագանու անդամ Լևոն Բարսեղյանը, քանի որ Կոշտոյանն  իր քանդակագործության ուսուցիչն է եղել: Սամվել Բալասանյանը  կատակեց. «Փաստորեն քանդակել գիտեք, պարոն Բարսեղյան»:

Ավագանու այսօրվա կարևոր որոշումներից էր Գյումրիում  տրանսպորտի 70 կանգառների տեղադրման հարցը, ինչն էլ  ընդունվեց:Ավագանիներից մի քանիսի դիտարկմանը,  թե ինչու կանգառներին վերաբերող  նախագիծը հանձնաժողովում նախապես չի քննարկվել եւ միանգամից ընդգրկվել է նիստի օրակարգ, քաղաքապետը հակադարձեց, թե հրատապ էր եւ մինչև օգոստոս 37 ավտոբուս պետք է քաղաք բերվի: Այստեղ էլ նրան հակառակվեց Լևոն Բարսեղյանը՝ ընդգծելով, որ հրատապը տարերային աղետներին է վերաբերում կամ այլ շտապ դեպքերին, սա այդ դեպքը չէր: Ավագանիները քննարկեցին, թե ինչպես եւ ովքեր են տեր կանգնելու, հսկելու ավտոբուսների  աշխատանքը, դա երկար ուսումնասիրելու հարց է:  Քաղաքապետի խոսքերով տրանսպորտին վերաբերող հարցի շուրջ  հանրային քննարկում կկազմակերպվի: 

Ավագանին այսօր արտոնություն տվեց նաև Հայ Առաքելական եկեղեցու Շիրակի թեմին՝ զեղչելով  թեմապատկան փոխադրամիջոցների համար հաշվարկված գույքահարկի գումարը: Նման դիմում- խնդրանքով քաղաքապետին դիմել էր Շիրակի թեմի առաջնորդը՝ պատճառաբանելով, որ եկեղեցու միջոցները սուղ են: Այս որոշմանը դեմ էր ավագանու անդամներից մեկը: Հայկական վերածնունդ խմբակցության ավագանու անդամ Հասմիկ Եղիազարյանը  քվեարկությունից առաջ անգամ հետաքրքրվեց՝ թերահավատորեն հնչեցնելով. «Եկեղեցին այդքան սնա՞նկ է»:Քաղաքապետն ակնհայտորեն պաշտպանեց. «Այդ առումով , այո, սնանկ է»:
Ավագանին այօր հաստատեց նաև կարևոր այն  4 ծրագիրը, որոնց իրագործման համար կառավարությունը մոտ կես մլրդ դրամի  սուբսիդավորում պետք է անի: Ծրագրերը  կներկայացնենք առաջիկայում: