Վառելիքով բարձած վագոնների վթարն ու հրդեհը, հնարավոր է, կազմակերպված են եղել
Չի բացառվում, որ «Հարավկովկասյան երկաթուղի» ՓԲԸ Թումանյանի տեղամասում հուլիսի 29-ին լույս 30-ի գիշերը բռնկված հրդեհը կազմապերպված է եղել ինչ-ինչ անձանց կողմից։
Այս վարկածը քննարկվել է «Հարավկովկասյան երկաթուղի» ՓԲԸ-ում պատահարի կապակցությամբ տեղի ունեցած օպերատիվ խորհրդակցության ժամանակ։ Այս մասին հայտնում է ՀԿԵ մեր աղբյուրը։
Հիշեցնենք, որ հուլիսի 29-ին, լուսաբացին մոտ «Հարավկովկասյան երկաթուղի» ՓԲԸ Թումանյանի կայարանի մոտակայքում գծերից դուրս են եկել վառելիքով բեռնված 7 վագոններ, ինչի արդյունքում հրդեհ է բռնկվել: Ինչպես տեղեկացրին «Հարավկովկասյան երկաթուղի» ՓԲԸ-ից, հրդեհը մարվել է առավոտյան 07:30-ի կողմերը։ Զոհեր չեն եղել։ Դեպի Բաթումի ուղևորվող գնացքը մոտ 20 ժամ կանգնեցրել են, մինչը որ վթարված գծերը նորոգվել են:
Այրված վառելիքը պատկանում է «CPS oil քորփորեյշն» ընկերությանը։
Այժմ «երկաթուղում» ներքին հետաքննություն է անցկացվում վթարի պատճառները պարզելու համար։ «Պարզելուն պես կտեղեկացնենք հանրությանը։ «Այս օրերին վերականգնվում է ենթակառուցվածքը, որ հետագայում խնդիրներ չլինեն», - հայտնեցին «Հարավկովկասյան երկաթուղի» ՓԲԸ -ից։ Քննարկվե՞լ է արդյոք ահաբեկչության վարկածը, հարցին երկաթուղու գրասենյակից պատասխանեցին․ «Ոչ մի վարկած չի կարելի բացառել»։
Երկաթգծում ոմանք համարում են, որ հրդեհը կարող էր լիներ ահաբեկչական ակտ ռուսական ընկերության և երկաթգծի հեղինակության դեմ, որ վթարը կարող էր կազմակերպված լինել, ցույց տալու համար, որ ՀԿԵ-ի իրականացրած բեռնափոխադրումները անվտանգ չեն։
Բանն այն է, որ ցիստերններով բարձած էլեկտրաքարշակների վագոնների անկում է տեղի ունեցել ռելսի վրայից, և այս հանգամանքը տարօրինակ է, քանի որ այդ տեղամասում գծերը նորոգված են ու ամբողջությամբ փոփոխված։ «Թումանյանը» երկաթուղու առավել բարվոք վիճակում գտնվող տեղամասերից է։ Այստեղ բարձր արագություն կարելի է զարգացնել, սակայն, ըստ աղբյուրը, ցիստերներով բարձված վագոնները դանդաղ են սլացել։
Մյուս կողմից երկաթգծի այս հատվածի առանձնահատկությունը հասանելիությունն է։ Մարդիկ կարող են հանգիստ մոտենալ գծերին։ Ահա ինչու ընկերությունում հակված են կարծելու, որ ինչ-որ մեկը նպաստել է, որ էլեկտրաքարշակի վագոնները դուրս գան գծերից։
Ի վերջո, բավական է մեկ մետաղյա ձող տեղադրել երկու ռելսերի արանքում, և վագոնի անկումը գծից անխուսափելի է։
Կարծիքներ