11 հոգանոց ընտանիքը 10 ամիս շարունակ սպասում է, որ Փաշինյանը վերականգնի արդարությունը
Անուշ Դաշտենց
12 Հունիս 2019 | 14:46
0
Արմավիրի մարզի Մրգաշատ գյուղի բնակիչ Էդվարդ Ներսիսյանը տասն ամիս առաջ նամակ է գրել վարչապետ Նիկոլ Փաշինյանին՝ խնդրելով վերականգնել իր ու ընտանիքի նկատմամբ թույլ տրված անարդարությունը։ Տեղեկացրել է, որ 68 տարեկան մարդ է, հիվանդության պատճառով 1997-ից կենսաթոշակի է անցել։ Նա ու 11 հոգանոց ընտանիքը 2002 թվականից զրկված են հողի սեփականաշնորհման իրավունքից։
Ի հեճուկս նրա, որ Հողային օրենսգրքի 64-րդ հոդվածն ասում է․ «Պետության և համայնքների սեփականության հողամասերը սեփականության իրավունքով անհատույց տրամադրվում են գյուղատնտեսական գործունեության համար որպես տնամերձ կամ անհատական բնակելի տան կառուցման ու սպասարկման համար՝ սահմանամերձ, լեռնային, բարձրլեռնային, երկրաշարժից տուժած և լքված բնակավայրերի այն ընտանիքներին, որոնք նախկինում չեն օգտվել հողի սեփականաշնորհումից, չեն ստացել տմամերձ կամ բանկելի տան շինարարության և դրա սպասարկման համար հողամասեր: Հայաստանում բնակվող այն ընտանիքներին, որոնք ցանկություն են հայտնում մշտական բնակություն հաստատել նշված բնակավայրերում, վերաբնակեցվածերին, զոհված և հաշմանդամ դարձած ազատամարտիկներին, չորս և ավելի երեխա ունեցող ընտանիքներին, որոնք չեն օգտվել հողի սեփականաշնորհումից>: Էդվարդը թե՛ ազատամարտիկ է, թե՛ թոշակառու, թե՛ իր 11 հոգանոց ընտանիքում (կինը, աղջիկը, երկու տղաները, երկու հարսները) ապրում է 6 թոռ։
Հողի սեփականաշնորհման մերժումն այն ժամանակվա մարզպետ Ալբերտ Հերոյանի անունով է, կա կից ստորագրություն ևս՝ Արմեն Դարբինյան։ «Էս մարդն ինձ միլիոնների վնաս է տվել, ո՞վ պետք է դրա համար պատասխան տա։ Ինձ օրենքով 2 հեկտար հո՞ղ է հասնում»,- հարցնում է Էդվարդ Ներսիսյանը։ Նա նշեց, որ Դարբինյանը ողջ է, մինչ օրս աշխատում է Արմավիրի մարզպետարանում։ 2001-ից Ներսիսյանի ընտանիքի մի մասը վարձակալական հիմունքներով բնակվում է Արմավիրի մարզի Մրգաշատ գյուղում՝ Էդվարդի հայրական տանը, որն Էդվարդի եղբոր աղջկա սեփականությունն է։ Նշված տարիների ընթացքում Էդվարդը 3 անգամ դիմել է նախկին նախագահներին, Արմավիի մարզպետարան և հիմա տասն ամիս սպասում է, որ Նիկոլ Փաշինյանը վերականգնի արդարությունը։ Հարցրինք՝ իշխանափոխությունից հետո դիմե՞լ է մարզպետարան, ասաց՝ ոչ, Նիկոլ Փաշինյանը վարչապետն է, թող նա էլ վերականգնի։
Կարծիքներ