Բացառում եմ, որ Սանասարյանի դեմ ցուցմունքներ կորզվեն․ Հ․ Աղազարյան

«Հրապարակ» հարցազրույցը «Իմ քայլը » խմբակցության պատգամավոր Հովիկ Աղազարյանի հետ

-Պարոն Աղազարյան, գոյություն ունի անմեղության կանխավարկած, սակայն  ՊՎԾ նախկին պետ Դավիթ Սանասարյանի մեղադրանքը չե՞ք համարում դավաճանություն հեղափոխության արժեքներին։

-Նախ, սպասենք, էդ ամեն ինչի ամբողջական ավարտը լինի, և,այո, կա անմեղության կանխավարկած։

-Ենթադրում եմ, որ եթե նախաքննության մարմինը չունենար շատ հիմնավոր կասկածներ, նման բարձրաստիճան պաշտոնյայի դեպքում գործին ընթացք չէր տրվի, նման մեղադրանք չէր առաջադրվի։

-Ես այս հարցին կարող եմ ընդհանուր պատասխանել, որ շարժման որևէ մասնակից եթե թույլ տա հակաօրինակ լուրջ զանցանք, ապա դա ես կհամարեմ դավաճանություն։

-Նախկինները մեջբերելով Դավիթ Սանասարյանի հայտարարությունը, որ քրեական մեղադրանքը շինծու է, նշում են, որ կամ Հայասանում արդարադատությունը շինծու է, այդ թվում՝ Մանվել Գրիգորյանի, Քոչարյանի գործերը կամ եթե շինծու չէ, ուրեմն ճիշտ չէ Նիկոլ Փաշինյանը, երբ ասում է, որ չկա համակարգային կոռուպցիա։ Կամ, կամ․ չկա երրորդ տարբերակը։

-Նման բառախաղերով միշտ էլ կարելի ցանկացած իրավիճակ այնպես ներկայացնել, որ չկարողանաս նույնիսկ պատասխան տալ։ Կարող է՝ շինծու չէ, հիմնավոր չէ, նախաքննությունն էդ դեպքում կպարզի։ Բայց եթե իրավապահ մարմինները նմանատիպ գործըթնթաց են սկսել, մենք հո չէի՞նք  արգելել էդ գործըթնացը, ինչ է, թե անձը կամ քաղաքացին հեղափոխության մասնակից է կամ ակտիվի՞ստ։ Դա պետք է լինի ընթացակարգով և համապատասխան տրամաբանական լուծման հանգի։ Մենք չենք ասել․․․  մենք ասել ենք՝ կոռուպցիան որպես համակարգային երևույթ չկա։ Կարող են առանձին անհատներ նման դրսևորումներ ունենալ, և պայմանավորված նրանով, որ իշխանությունները ինչ ընթացք կտան դրան, այ, դրանով է պայմանավորված կոռուպցիայի լինել կամ չլինելը։ Եթե լռեն, թաքցնեն, այ դա ուրիշ բան։Ինչպես ժամանակին արվում էր։ Բայց եթե նմանատիպ երևույթները լինեն և դա բացահայտվի, ապա հենց նշանակվում է, որ կոռուպցիա չկա։

-Սանասարյանի հայտարարություններին ոնց եք վերաբերում։ Նորմա՞լ է, որ պետական բարձրաստիճան պաշտոնյան նույն իշխանության մեկ այլ բարձրաստիճան պաշտոնյայի նման  մեղադրանքներ ներկայացնի։ Դուք անձամբ դրանից ի՞նչ եք հասկանում։

- Չեմ կարող մեկնաբանել Դավիթ Սանասարյանի խոսքերը։ Սպասենք մի քիչ, ժամանակը կգա գնահատականները կտրվեն, երբ ամեն ինչ հասցվի տրամաբանական ավարտին և ունենանք ռեալ պատասխանը։

-Ուղղակի, երկուսն էլ պատահական մարդիկ չեն։ Չե՞ք կարծում, որ  «Իմ քայլին», նոր իշխանությանը հարվածի տակ է դնում։

-Դժվարանում եմ ասել, որովհետև եթե վաղը- մյուս օրը պարզվի կամ չհիմնավորվի էն մեղադրանքը, որ արդեն հարուցված է, ապա համապատասխան մարմինները պետք է ինչ-որ իմաստով գնահատական տան էդ երևույթին։ Բայց, բոլոր դեպքերում,պետք է սպասենք։

-Իսկ հնարավոր համարո՞ւմ եք, որ նման բարձրաստիճան պաշտոնյայի նկատմամբ ձեր իշխանության օրոք ցուցմունքներ կորզվեն։

Ես դա բացառում եմ։ Այ, դա բացառում եմ, որովհետև դա բարձրագույն  ղեկավարության համար անընդունելի գործելաոճ է։  Եթե նման գործելաոճով շարժվենք, ճանապարհին շատ-շատ սխալներ թույլ կտանք։  Հակառակը, ամեն ինչ պետք է լինի օրենքի սահմաններում ու թափանցիկ, որ ամեն ինչ ամենքին պարզ լինի։ Եթե մենք գնացինք այլ ճանապարհով, տեղ չենք հասնի։

-Անձամբ Սանասարյանից նման բան հավատու՞մ եք։

-Չեմ ասի՝ հավատում եմ կամ չեմ հավատում։ Կասեմ, որ իմ համար անսպասելի էր։

-«Սասնա ծռերի»  տարածած հայտարարության համաձայն՝ Դավիթ Սանասարյանի նկատմամբ քրեական հետապնդումը կրեմլյան նեոգաղութային ռևանշի դրսևորում է։

-Վստահ եմ, որ էդ խոսքերը գրողը ճիշտ չի պատկերացնում՝ ինչ է նշանակում․․․ էդ գանգուր տերմինները, կարծում եմ՝ տեղին էլ չի օգտագործել՝ խոսքն արժևորելու համար։