Նույնիսկ նախկինները դիմադրել են ռուսներին՝ դպրոցների հարցում

ՌԴ արտաքին գործերի նախարար Սերգեյ Լավրովը հայտարարել է, թե Հայաստանում հայկական կողմի ցանկությամբ եւ նախաձեռնությամբ կբացվեն ռուսական դպրոցներ: Լավրովի այս հայտարարությունը բազմաթիվ քննադատությունների եւ քննարկումների առիթ է դարձել: Այս եւ այլ հարցերի մասին «Հրապարակը» զրուցել է գրող, հրապարակախոս Տիգրան Պասկեւիչյանի հետ:

- Անկախ Հայաստանը, կարծես, առավել, քան երբեւէ, հայտնվել է Ռուսաստանի ազդեցության տակ: Խոսվում է Հայաստանում կրկին ռուսական դպրոցները վերաբացելու մասին: Ռուսական դպրոցներն անկախ Հայաստանում Ձեր` անկախականներիդ գաղափարներին դեմ չե՞ն:

- Դուք արդեն Ձեր հարցին պատասխանեցիք…. ես էլ ի՞նչ ասեմ: Ցանկացած երկրում կա պետական լեզու, եւ կան պետական լեզվով դպրոցներ: Հայաստանում եւս կա պետական լեզու, ուստի պետք է լինեն միայն պետական լեզվով դպրոցներ: Ինչ-որ բացառություններ բոլոր երկրներում էլ արվում են, մենք էլ բացառություն չենք այս մասով: Ռուսական զինծառայողների եւ ռուս քաղաքացիների համար կան մեկ-երկու դպրոցներ: Դա բնական է, բարոյական է եւ մարդկային, բայց Հայաստանում չպետք է բացվեն ռուսական դպրոցներ: Ես այդ ամենն առանձնապես չեմ կապում Սովետական Միությունը վերականգնելու գաղափարի հետ: Ռուսները մշտապես բոլոր ժամանակներում, հատկապես վերջին քսան տարվա ընթացքում հնարավոր ամեն բան արել են իրենց ազդեցությունն առավել մեծացնելու համար, սակայն նույնիսկ նախկին իշխանությունները դիմադրել են նրանց: Հիմա օրվա իշխանություններն այնքան թույլ ու ողորմելի են, որ չեն կարողանում դիմադրել: Ես ունեմ ստույգ տեղեկություններ, որ այդ հարցը դրվել է նաեւ Սերժ Սարգսյանի իշխանավարման տարիներին, սակայն հնարավոր եղել է պահանջը չեզոքացնել, եղել է դիմադրություն: Հիմա դիմադրել չեն կարողանում: Եթե իշխանության գլխին կանգնած մարդիկ դիմադրել չեն կարողանում, ուրեմն պետք է հասարակությունը ոտքի կանգնի, եւ սկսվի հասարակական ակտիվ շարժում:

- Իսկ երբեւէ կպատկերացնեի՞ք, որ հեղափոխական իշխանությունները կարող են նման քայլի գնալ:

- Էսքան բանը որ տեղի ունեցավ վերջին մեկ-երկու տարվա ընթացքում, հիմա ամեն ինչ պատկերացնում եմ: Էս իշխանությունները քանի կան, ամեն ինչ կարելի է պատկերացնել:

- Օրվա իշխանությունները մե՛կ աչքի են ընկնում հակառուսական կեցվածքով, մե՛կ էլ հանկարծ անում են նմանօրինակ պրոռուսական քայլեր: Ի վերջո, ո՞րն է Նիկոլ Փաշինյանի աշխարհաքաղաքական դիրքորոշումը:

- Էն, ինչ անում են մեր իշխանությունները, կարելի է բնութագրել հետեւյալ կերպ` գավառական շուստրիություն: Իրենց թվում է, թե իրենք կարող են խաղեր տալ, բայց մենք տեսնում ենք, որ այդ խաղերի արդյունքում մեր զիջումները Ռուսաստանին գնալով սաստկանում են: Մարդկային հարաբերություններում եւս մարդիկ սիրում են նստել քննարկել այն մարդկանց հետ, որոնք հարգալից են դրսեւորում իրենց, բայց երբ դիմացինդ գյադայություն է անում, այսպես է լինում:

- Իսկ գավառամիտ «շուստրիության» քայլերն ինչի՞ համար են արվում, իշխանությունն ամեն գնով պահելո՞ւ, թե՞ ինչ-որ ծրագիր են իրագործում:

- Նիկոլ Փաշինյանի կառավարությունն ինչ անում է, անում է իր իշխանությունը պահելու համար, որեւէ այլ բանի համար ոչինչ չի անում, հակառակ դեպքում արդեն հասկացած կլինեին, որ իրենք այսօր չպետք է իշխանություն լինեին:

- Մարտի 1-ի դեպքերը բոլորս ենք հիշում: Նույն Նիկոլ Փաշինյանը բազմապիսի հալածանքների ենթարկվեց։ Հիմա մոտավորապես նույն բանն անում է ինքը: Խաղաղ ակցիա իրականացնող քաղաքացիները ենթարկվում են տարատեսակ հալածանքների:

- Ես այդ շարժման մասին ընդհանրապես խոսել չեմ ցանկանում, իրենք ինձ համար սիմպատիչնի չեն: