Մեր ընտանիքը անհիմն չի մեղադրելու,միևնույնն է, ամեն ինչ պարզվելու է. մահացած փոքրիկի ծնողներ

Օրերս  «Արաբկիր»  բժշկական կենտրոն տեղափոխված 3-ամյա Մարիան  ըստ նախնական տեղեկությունների մահացել էր սրտի կանգից: Թե ինչն է եղել  երեխայի մահվան իրական պատճառը, վարկածները տարբեր էին:  Hraparak.am -ը կապ հաստատեց Մարիայի ընտանիքի հետ.  « Հաշվի առնելով հանրային մեծ ռեզոնանսը՝ մեր դստեր  մահվան հանգամանքերի հետ կապված, ուզում ենք տեղեկացնել, որ մեր փոքրիկը եղել է առողջ, չի ունեցել ուղեկցող որևէ հիվանդություն։ Երեխան մահացել է ասֆիքսիայից՝ շնչահեղձությունից, որն էլ, իր հերթին, առաջացել է սննդի վերին շնչառական ուղիներն ընկնելուց։ Մահվան պատճառն, ըստ ՀՄԴ-10 դասակարգի, T 17.9: Սա, արդեն, պաշտոնապես հաստատված և արձանագրված տեղեկություն է:Մեր ընտանիքը հետաքննությունից առաջ չի ընկնելու և անհիմն չի մեղադրելու: Միևնույնն է, ամեն ինչ պարզվելու է...Աստված թող բոլորի երեխաներին պահապան լինի»,-փոխանցեցին ծնողները:

Հիշեցնենք, որ մարտի 4-ին, Երևանի թիվ 153 մանկապարտեզից  «Արաբկիր»  բժշկական կենտրոն էր տեղափոխվել 3-ամյա Մարիա Առաքելյանը: Նույն օրը  երեխան մանկապարտեզում ճաշից հետո պառկել է քնելու, մի քանի րոպե անց սկսել է խռխռալ։ Երբ դաստիարակը մոտեցել է նրան, նկատել է փսխած զանգված, իսկ փոքրիկը  նրա կանչին չի արձագանքել: Դաստիրակները զանգել են Շտապօգնության ծառայություն, ապա երեխայի հորը, որը մասնագիտությամբ բժիշկ է։ «Արաբկիր» ԲԿ–ի բժիշկները ժամեր շարունակ պայքարել են երեխայի կյանքի համար, սակայն ապարդյուն։ 23։30–ին ահազանգ է ստացվել, որ երեխան մահացել է։

 Մարիան, տան երրորդ զավակն էր։ Նրա ավագ քույրն  ու եղբայրը ևս հաճախել են նույն` համար 153 մանկապարտեզը։

Դեպքի առթիվ 2019 թվականի մարտի 5-ին Դատախազությունում հարուցվել է քրեական գործ: