Ո՞ւմ է ձեռնտու Հոկտեմբերի 27-ի գործին կրկին դիպչելը
Թագուհի Հակոբյան
20 Մարտ 2019 | 21:16
0
Hraparak.am-ի հարցերին պատասխանում է Պահպանողական կուսակցության նախագահ Միքայել Հայրապետյանը։
- Ըստ Ձեզ՝ ինչո՞ւ է հիմա պաշտպանության նախկին փոխնախարար Վահան Շիրխանյանը նամակ հղում անազատության մեջ գտնվող ՀՀ երկրորդ նախագահ Ռոբերտ Քոչարյանին։
- Պարոն Շիրխանյանը ևս երկարատև անազատության մեջ է գտնվել. երևի իրավունք ունի անազատության մեջ գտնվողին գրելու: Իսկ իր փոխարեն ես պատասխանել չեմ փորձի, թեև շատ բան պարզ է ինձ համար, մանավանդ որ մասնակիցն եմ եղել ՊՆ-ում հետհոկտեմբերքսանյոթյա չարչրկված հավաքին և հայտարարության տեքստն էլ ինքս եմ գրել, որը մեկ թե երկու օր անց «ղզիկացված» և ամորձատված հրապարակվեց:
- Որքանո՞վ է տեղին, երբ նամակում Վահան Շիրխանյանը հիշատակում է Կարեն Դեմիրճյանի, Վազգեն Սարգսյանի, Վահրամ Խորխոռունու, Լեոնարդ Պետրոսյանի խոսքերը, երբ նրանք ողջ չեն։
- Պարկեշտ չէի համարի պարոն Շիրխանյանի փոխարեն խոսել, առավել ևս՝ դատել նրա վարքը:
- Ինչպիսի՞ն պետք է լինի իրավապահ մարմինների արձագանքը Վահան Շիրխանյանի նամակին։
- Եթե պարոն Շիրխանյանի այս նամակում ավելի տեղեկույթ կա, քան նրա նախաքննական ցուցմունքներում, ապա իրավապահ մարմինների՝ օրենքով նախատեսված պարտավորությունն է, որ Հոկտեմբերի 27-ի գործը վերաբացեն: Պարզապես այլ խնդիր է, թե ում է ձեռնտու այժմ կրկին այդ գործին դիպչելը: Անձամբ վստահ եմ, որ այդ գործը կարող է բացահայտվել բացառապես այն ժամանակ, երբ մենք իրոք անկախ երկիր կդառնանք:
Կարծիքներ