Նոր սկանդալ. Պենտագոնի ղեկավարը ռազմական գաղտնի տվյալներ է հայտնել իր կնոջն ու եղբորը

Պենտագոնի ղեկավար Փիթ Հեգսեթը Signal-ի մասնավոր չաթում գաղտնի տեղեկատվություն է ուղարկել Եմենում հութիների դեմ առաջիկա հարվածների մասին՝ իր կնոջ, եղբոր և փաստաբանի հետ մասնավոր զրույցի ժամանակ: 

Այս մասին հայտնում է The New York Times-ը, իսկ տեղեկությունը հաստատել են CNN-ն ու Reuters-ը։

Մարտի 13-ին Հեգսեթը «Defense | Team Huddle» անվանումով  զրուցախմբին տվյալներ է փոխանցել գործողությանը մասնակցող F/A-18 Hornets-ի թռիչքների մասին: 

Աղբյուրներն ասում են, որ զրույցը կայացել է հունվարին՝ նախքան նրա նշանակումը և ներառում է մոտ տասը հոգի իր մերձավոր շրջապատից:

Նախարարի կինը՝ Fox News-ի նախկին պրոդյուսեր Ջենիֆեր Հեգսեթը, պաշտպանության նախարարության աշխատակից չէ, սակայն ամուսնուն ուղեկցել է օտարերկրյա զինվորականների հետ հանդիպումներին։ 

Հեգսեթի եղբայրն ու փաստաբանը, ովքեր մասնակցել են զրույցին, աշխատում են Պենտագոնում, սակայն նրանց ռազմական տվյալներ ուղարկելու նպատակը մնում է անհասկանալի։

Ավելի վաղ, ամերիկյան ԶԼՄ-ները ենթադրել էին, որ Հեգսեթի պաշտոնանկությունը հավանական է այդ ու այլ սկանդալների պատճառով: