Եթե դրա կարիքը լինի, կդիմեմ նաև այս կառավարությանը. օպերային երգչուհին՝ լիբանանահայերին օգնելու մասին

Ծնունդով գյումրեցի, բազմաթիվ միջազգային տիտղոսների դափնեկիր, օպերային երգչուհի Արևիկ Թանաշեանը այս օրերին խորը ցավ է ապրում: Երգչուհու խոսքով՝ Բեյրութում տեղի ունեցած ողբերգությունը  համամարդկայինից բացի, իր համար նաև ինչ-որ առումով անձնական է, քանի որ ամուսինը լիբանանահայ է, ինքն  ու երեխաները՝ Լիբանանի քաղաքացիներ: «Լիբանանը իմ 2րդ հայրենքն է, որտեղ չեմ ծնվել,  բայց այն ինձ հոգեհարազատ է , համոզված եմ՝ այնպես , ինչպես բոլոր հայերի համար, քանի որ գիտեք ՝ Լիբանանը հայության սիրտն է,  և այն թանկ գոհարը, որը ժամանակին  համարվում էր ջարդերից փրկված հայության տուն»,-մեզ հետ զրույցում ասաց նա:

Այնտեղ գտնվող հարազատների, ընկերների, ուսանողների, բոլորի հետ կապ են հաստատել, որպեսզի ճշտեն՝ ինչպես են: Նրանք ողջ եւ առողջ են, բայց սաստիկ վախեցած են: Արևիկ Թանաշեանը վերջին անգամ Լիբանան էր մեկնել 2016 թ.-ին՝ մենահամերգով հանդես գալու: Բարեգործական համերգ տալու նպատակով կարանտինից հետո նույնպես պլանավորել էր մեկնել: Նա  մեկ անգամ չէ , որ հանդես է եկել բարեգործական համերգներով:

Դեռ նախորդ կառավարության օրոք նամակ-խնդրանքով դիմել էր Սփյուռքի նախարարությանը՝  ընդառաջել  իրեն  համերգի կազմակերպչական հարցերում, որի հասույթը  ուղարկվեց Սիրիա՝ տրամադրելու այնտեղի մեր հայրենակիցներին: Մեր հարցին, թե հնարավոր է այս անգամ էլ նմանատիպ նախաձեռնությամբ հանդես  գա՝ դիմելով ներկայիս կառավարությանը, որպեսզի օգնի  լիբանանահայերին, երգչուհին պատասխանեց, «Ես միշտ կանգնած եմ հայ զինվորի կողքին, ինչպես նաև սփյուռքահայերի կողքին , և յուրաքանչյուր աղետ, ինչը կխոցի հային, աշխարհի որ ծայրում էլ,  որ լինի, ես որպես արվեստագետ, հայ և ամենակարևորը քրիստոնյա, պատրաստ եմ իմ աջակցությունը և զորակցությունը հասցնել :Եթե դրա կարիքը լինի, կդիմեմ նաև այս կառավարությանը, իսկ Բեյութում կատարվածի հետ կապված՝ կուզեի իմ սրտի խոսքը ասել: Ամբողջ աշխարհն ուզում է ռեքվիեմ երգել՝  հրաշք Լիբանանի համար։ Ափսոս, ու հազար ափսոս իմ չքնաղ քաղաք, որքան ցավ ապրեցինք բոլորս, միայն կասեմ սիրելի հայրենակիցներ մենք Ձեր կողքին ենք, աղոթում ենք առ Աստված: Ձեր ցավն ու կորուստը նաև մերն է, քանզի Աստծո զավակն ենք մենք և հավասար ենք նրա աչքին՝ անկախ ազգության և դավանանքի , Ձեզ ծով համբերություն այս դժվարին օրերին»: 

Հիշեցնենք, որ օգոստոսի 4-ի երեկոյան հզոր պայթյուն էր որոտացել Բեյրութի նավահանգստում։ Ուժգին պայթյունը վնասել է նավահանգստից կիլոմետրերով հեռու շենքերն ու բնակարանները։ Նախնական տվյալներով՝ զոհվել են  100-ից ավել քաղաքացիներ, վիրավորների թիվը 5000-ը անցնում է: