Եկեք «սիրուն աղջիկ» բառը էլ չօգտագործենք․ Քաղավիացիայի սիրուն աղջիկ
Քաղավիացիայի կոմիտեի նախագահ, մեկ տարում 11 երկրներում ճամփորդած Տաթևիկ Ռևազյանն այսօր լրագրողների հետ հանդիպմանը փորձեց արդարացնել իր գործուղում-վոյաժներն ու ապացուցել, որ ինքը միայն սիրուն աղջիկ չէ, որը զբաղված է սոսկ բյուջեի հաշվին ճամփորդելով, ինչպես նկատել էր «կլասիկ պատգամավոր» Էդմոն Մարուքյանը, նա նաև արդյունք է ցույց տալիս։
«Մեր «կլասիկ» պատգամավորը, որը մտնում է լայվ, մինչև դա անելը, լավ կլիներ՝ մեկ անգամ զանգահարեր մեզ, որովհետև, երբ նա լայվ էր մտնում, այդ նույն պահին մենք հարց էինք լուծում և կարող էինք տեղեկացնել, թե ինչ քայլեր ենք անում»,-ասաց Ռևազյանը՝ ակնարկելով Մարուքյանին ու նրա լայվը «սիրուն աղջկա» թեմայով։ Հետո այս թեման նաև զարգացավ խորհրդարանում, և «Իմ քայլի» պատգամավորները սկսեցին կանգնել Տաթևիկի թասիբին։
«Ու էն, որ ես շատ եմ ճանապարհորդել, բերել է նրան, որ Սինգապուրի ավիացիան, օրինակ, անվճար կրթություն է մեզ տրամադրում, Չինաստանի քաղավիացիան անվճար կրթություն է մեզ տրամադրում»,-ասաց նա՝ թվարկելով իր ճանապարհորդությունների արդյունքները։
Hrapark.am-ը նկատեց, որ իրենից իրականում ավելի շատ հեղափոխական արդյուքններ են սպասում, որ տեսնեն՝ Մարուքյանի ասած այդ սիրուն աղջիկը նաև կարողանում է կոնկրետ արդյունքներ ցույց տալ, որպեսզի ավելի շատ քննարկվի ոչ թե նրա՝ սիրուն աղջիկ լինելը, այլ կատարած աշխատանքը։
Քաղավիացիայի կոմիտեի նախագահին, սակայն, դուր չեկավ, որ անընդհատ շեշտադրվում է «սիրուն աղջկա» վրա, դա նա համարեց ոչ պրոֆեսիոնալ։ «Եկեք «սիրուն աղջիկ» բառը էլ չօգտագործենք և հարգենք մարդկանց»,-ասաց նա։
Ասացին, որ «սիրուն աղջիկը» իրեն այդպես անվանողների խոսքերով ենք մեջբերում, սակայն Ռևազյանը համարեց, որ պետք չէ որևէ մեկի խոսքերով խոսել․ «էստեղ պրոֆեսիոնալիզմը պետք է բարձր մակարդակի վրա պահպանել»։
Առաջարկեցինք դա համարել որպես կոմպլիմենտ։ «Չէ, ես չեմ ուզում դա որպես կոմպլիմենտ ընդունել»,-ասաց նա
Հարցին՝ նեղսրտե՞լ դրանից, Ռևազյանն ասաց․ «Չէ, իրականում ուրախացել եմ, որ տենց բան եղել ա, որովհետև Ազգային ժողովում լուրջ քննարկում ա եղել, և հուսով եմ՝ դա մեծ փոփոխություններ կբերի Հայաստանում,որ ապագա կին պաշտոնյաները նույն խնդիրների առաջ չկանգնեն»։
Կարծիքներ