«Իմ քայլ»-ն ու «Լույսը» իրար «միս են ուտում». կրկին լեզվակռիվ ավագանու նիստին (տեսանյութ)

«Իմ քայլ»-ն ու «Լույսը» իրար «միս են ուտում». կրկին լեզվակռիվ ավագանու նիստին (տեսանյութ)

Երեւանի քաղաքապետարանի ավագանու նիստին հայտարարված ընդմիջումից հետո «Լույս» խմբակցության ավագանու անդամ Անի Խաչատրյանն անդրադարձավ «Իմ քայլը» ավագանու անդամ Էռնեստ Ավանեսովի ավելի վաղ ասված խոսքին՝ ԵԿՄ-ի վերաբերյալ:

«Իր խոսքի մեջ ասեց, որ Երկրապահի գրասենյակները, որոնք գտնվում են մանկապարտեզների շենքերում, չի հասկանում՝ ինչ ժառանգություն է դա, ցավում եմ, որ դուք չեք գիտակցում երկրապահի ժառանգությունը: Ուրեմն գնացեք Եռաբլուր, կհասկանաք՝ ինչ ժառանգություն է թողել: Ասեմ, որ երկրապահը Ձեզ Արցախ է թողել, ՀՀ է թողել: Աստված չանի, եթե նորից պատերազմ լինի, համոզված եմ, որ էս դահլիճում գտնվողների տասը տոկոսը չի գնալու սահման, երկրապահն ա գնալու ձեր ու ձեր երեխաների կյանքը պահելու, իսկ դուք ղումար եք խաղում երկրապահի գրասենյակի վրա. ամոթա՛, մի քիչ հայրենասիրություն ունեցեք»:

Քաղաքապետ Հայկ Մարությանը ելույթի վերաբերյալ ասաց. «Չեմ կարծում, որ ելույթը տեղին էր, որովհետեւ վստահ եմ, որ այս դահլիճում բոլորի մոտ նույն վերաբերմունքն է ձեր բարձրացրած հարցի շուրջ»:

Ավանեսովը արձագանքեց Անի Խաչատրյանի ելույթին՝ ասելով, որ ինքն այդպիսի բան չի ասել. «Ես նման խոսք չեմ ասել, խնդրում եմ՝ քաղաքական շահարկումների մեջ չմտնել: Ես խնդրում եմ կոռեկտութունը պահպանել»:

Անի Խաչատյանը, դիմելով քաղաքապետին, ասաց, որ կողմնապահություն է անում, չի ասում, որ օրակարգից շեղվում է:

«Իմ քայլը» խմբակցության ավագանու անդամները տեղից սկսեցին ռեպլիկներ անել՝ ուղղված Խաչատրյանին: