Նիկոլ Փաշինյանի ֆեյսբուքյան լայքերը քաղաքական վարկանիշի պես նվազում են

Վարչապետ Նիկոլ Փաշինյանն առաջներում բավականին բարձր վարկանիշ ուներ ոչ միայն ընտրողների շրջանում, այլև՝ համացանցում, մասնավորապես ֆեյսբուքում: Ըստ սոցիոլոգիական հարցումների՝ վարչապետ Փաշինյանի վարկանիշն օր օրի նվազում է: «Բրեվիս» ընկերության հարցումների համաձայն՝ Նիկոլ Փաշինյանի վարկանիշն այս պահի դրությամբ 16 տոկոս է: Եվ որքան Նիկոլ Փաշինյանի վարկանիշը նվազում է իրական կյանքում, կրկնակի անգամ շատ նվազում է համացանցում:

Մենք փոքրիկ ուսումնասիրություն կատարեցինք Փաշինյանի ֆեյսբուքյան էջում, հասկանալու համար, թե վերջին օրերին տեղադրված ռիլլերը, տեսանյութերն ու գրառումները քանի հավանում և քանի մեկնաբանություն ունեն: Նիկոլ Փաշինյանի յուրաքանչյուր գրառում 2018-ից հետո հավաքում էր նվազագույնը մի քանի տասնյակ հազար լայք: Այժմ Փաշինյանի գրառումները հավանում է 300-ից հազար ֆեյսբուքյան օգտատեր: Նա ժամեր առաջ տեղադրել է ԱԺ ամբիոնից իր ելույթը, որը հավանել է ընդամենը 332 օգտատեր: Երեկ Փաշինյանը նույնպես ֆեյսբուքում տեսանյութ է տեղադրել իր՝ Ազգային ժողովի ելույթից, որը հավաքել է ընդամենը 804 օգտատեր: Փաշինյանը տեսանյութեր է տեղադրել նաև հինգշաբթի օրվա կառավարության նիստից, որոնց հավանումները 300-ից 800-ի միջակայքում են։