Էրդողանի եւ Ալիեւի «նյուրնբերգյան դատավարությունն» այլեւս անխուսափելի է
ԵԱՀԿ ՄԽ համանախագահ երկրների նախագահներին
Մեծարգո պարոնայք, նախ թույլ տվեք հավաստել մեր բարձր հարգանքը Ձեր եւ Ձեր ժողովուրդների նկատմամբ եւ խորին շնորհակալություն հայտնել Արցախի Հանրապետության դեմ Թուրքիայի եւ Ադրբեջանի սանձազերծած ահաբեկչական պատերազմի դադարեցմանը Ձեր գործուն աջակցության համար:
Երկրորդ աշխարհամարտի ժամանակ ձեւավորված հակահիտլերյան կոալիցիան ոսկե տառերով է գրել պատմության էջերում իր առաքելության փայլուն կատարման մասին, որի վերջակետը հանդիսացավ նյուրնբերգյան դատավարությունը, դատավարություն, ինչի շնորհիվ իրենց արժանի պատիժը ստացան մարդկության դեմ հանցագործություններ գործած գլխավոր անձինք:
Ներկայում, ըստ էության, ընթանում է սողացող երրորդ աշխարհամարտը, որը մեծ մասշտաբներ կընդունի, եթե չկանգնեցնեք դրա գլխավոր հրձիգ Թուրքիային: Վերջինս, «փակված» համարելով օսմանյան կայսրությունում իրագործված Հայոց ցեղասպանության եւ այլ հանցագործությունների «հաշիվները», առայժմ Լիբիայից մինչեւ Կասպից ծով փորձեր է ձեռնարկում այդ կայսրությունը վերականգնելու ցնորամիտ գաղափարի իրականացման համար: Այդ նպատակի հիմքում դրված է անատոլիական ֆաշիզմի գաղափարը՝ թուրքիզմը, որն անհամեմատ ավելի վտանգավոր է, քան գերմանական ֆաշիզմն էր, վտանգավոր, որովհետեւ առանձին դեպքերում, երբ այդ ճանապարհին առաջանում են դժվարություններ՝ ոտնահարելով հարյուրավոր միլիոն մուսուլմանների սրբությունները, թուրքիզմը փաթեթավորվում է ծայրահեղական իսլամով՝ այդպիսով առաջացնելով միջկրոնական աշխարհամարտի սպառնալիք:
Ակնհայտորեն՝ Արցախի Հանրապետության 150 հազարանոց բնակչության դեմ սանձազերծված ագրեսիայի ժամանակ կիրառված քիմիական զենքը, կասետային ռումբերը, քաղաքացիական բնակչության ռմբակոծություններն ու հրթիռակոծությունները, գերիների ու սպանվածների գլխատումներն ու խոշտանգումները բավարար հանցակազմեր են՝ Էրդողանին եւ Ալիեւին միջազգային դատարանի առջեւ կանգնեցնելու համար:
Գագիկ ՎԱՐԴԱՆՅԱՆ
Կարծիքներ