Ինչո՞ւ առաջադրենք, եթե այս պահին հրաժարվում են 

Ընդդիմադիր պատգամավորների՝ ԱԺ մշտական հանձնաժողովների նախագահների ու տեղակալների պաշտոնից հրաժարվելու դեպքում իրենց քվոտայի շրջանակներում նույն ընդդիմադիր խմբակցությունները կարող են այլ թեկնածուներ առաջադրել այդ պաշտոնների համար: Ի՞նչ են պատրաստվում անել ընդդիմադիրները և վերջապես կատարվածն արդյոք չի՞ ստեղծում քաղաքական ճգնաժամ, այս հարցերի պատասխանները փորձեցինք պարզել ԱԺ «Հայաստան» խմբակցության պատգամավոր Գեղամ Նազարյանից:

Հարցին, թե չե՞ք պատրաստվում ԱԺ մշտական հանձնաժողովներում նոր թեկնածուների առաջադրել և վերջապես տեղի ունեցածը քաղաքական ճգնաժամ չի՞ ստեղծում, պատգամավորն ընդգծեց. «Երկրում քաղաքական ճգնաժամ է, սա ակնհայտ իրողություն է, սակայն ինչ վերաբերում է հանձնաժողովների նոր նախագահներ առաջադրելուն, ապա ինչո՞ւ առաջադրենք, եթե այս պահին հրաժարվում են հանձնաժողովի նախագահներն իրենց աշխատանքից՝ գործող վարչակարգի ապօրինություններին ի պատասխան: Այս իշխանությունները համաշխարհային պատմության մեջ բացառիկ ու չլսված քայլի գնացին, որոշեցին միայն մեկ խմբակցության քվերարկությամբ պաշտոնից զրկել ԱԺ փոխնախագահին»:

Հարցին էլ, թե ի՞նչ եք պատրաստվում այժմ անել, գուցե արտահերթ խորհրդարանական ընտրությունների օրակարգ ձևավորվի, Նազարյանը նշեց. «Մեր պայքարը դա ցույց կտա, դեռևս պայքարն ընթացքի մեջ է: Մենք մեր առաջ խնդիր ենք դրել, տեսնենք թե ինչպես կստացվի», - իր խոսքը եզրափակեց Գեղամ Նազարյանը: