«Հայրենիքին մատուցած ծառայությունների համար» 3-րդ աստիճանի շքանշան՝ Մարգարիտա Սիմոնյանին

«Ռոսիա սեգոդնյա» մեդիախմբի և «Ռոսիա սեգոդնյա» միջազգային լրատվական գործակալության գլխավոր խմբագիր Մարգարիտա Սիմոնյանն արժանացել է «Հայրենիքին մատուցած ծառայությունների համար» 3-րդ աստիճանի շքանշանի:

ՌԴ նախագահ Վլադիմիր Պուտինից ստանալով պարգևը՝ Սիմոնյանն ասել է, որ կցանկանար այդ պարգևը կիսել իր միլիոնավոր հայրենակիցների հետ, որոնք դեռևս այս դահլիճում չեն եղել, բայց աշխատում են ոչ պակաս նվիրումով, ոչ պակաս ջանասիրությամբ և ոչ պակաս հայրենասիրությամբ:

«Միշտ անհարմար է բարձր պարգև ստանալը։ Հատկապես այսօր՝ մի աղջկա հետ, ով իրենով ծածկել է մարտիկին և փրկել նրան, տիեզերագնացների հետ, ովքեր ավելի քան մեկ տարի անցկացրել են ուղեծրում»,- ասել է նա:

Հանդիսավոր արարողությանը մասնակցել են շքանշաններով, մեդալներով և պատվավոր կոչումներով պարգևատրված քսանից ավելի անձինք: Նրանք զինվորականներ են, տիեզերագնացներ, հասարակական և կրոնական կազմակերպությունների ներկայացուցիչներ, պետական գործիչներ։

Պարգևատրվածների թվում են նաև երաժիշտներ, լրագրողներ, բազմազավակ մայրեր, առողջապահության, մշակույթի, կրթության և արդյունաբերության ոլորտի ներկայացուցիչներ: