Շնորհակալություն՝ ցտեսություն. Շոլցի կառավարությունն ազատված է

Գերմանիայի նախագահ Ֆրանկ-Վալտեր Շտայնմայերը կառավարության ղեկավար Օլաֆ Շոլցին և նախարարներին հանձնել է աշխատանքից ազատման նամակներ՝ շնորհակալություն հայտնելով նրանց կատարած աշխատանքի համար։  Այնուամենայնիվ, կանցլերը և Գերմանիայի կառավարության անդամները, Շտայնմայերի խնդրանքով, կշարունակեն պաշտոնավարել մինչև նոր կաբինետի ձևավորումը։

Միջոցառումը տեղի է ունեցել Բեռլինի Bellevue նախագահական պալատում։ 

Նախքան Շոլցին և նրա 14 նախարարներին պաշտոնանկ անելու նամակները հանձնելը, Շտայնմայերը հիշեցրել է այն խնդիրները, որոնց բախվել է նրանց կառավարությունը, այդ թվում՝ համաճարակը, Ուկրաինայում հակամարտությունը, արմատական ​​պաղեստինյան ՀԱՄԱՍ շարժման հարձակումը Իսրայելի վրա և դրան հաջորդած պատերազմը Գազայում: 

«Դուք՝ որպես Գերմանիայի կառավարություն, հաճախ ստիպված եք եղել գործել շատ արագ և վճռական»,- ասել է Շտայնմայերը։

Նոր Բունդեսթագի ձևավորումից հետո Շտայնմայերը խորհրդարանի անդամներին կոչ է արել հարգալից և կառուցողական համագործակցել միմյանց հետ։ 

«Մենք՝ որպես դեմոկրատներ, պետք է բաց մնանք երկխոսության և փոխզիջումների համար՝ չնայած բոլոր տարաձայնություններին, և զգուշությամբ վերաբերվենք միմյանց»,- նշել է Գերմանիայի նախագահը։

Զուգահեռաբար, այսօր տեղի է ունեցել նոր Բունդեսթագի (Գերմանիայի խորհրդարան) հիմնադիր նիստը։ Գերմանիայի Սահմանադրության համաձայն՝ այս օրը ավարտվում են կանցլերի և նախարարների լիազորությունները։ Եթե ​​մինչ այս պահը դեռևս չի ձևավորվել նոր կաբինետ, և Գերմանիայում հենց այսպիսի իրավիճակ է, ապա ներկայիս կառավարությունը պաշտոնապես ավարտում է իր լիազորությունները, բայց շարունակում է կատարել իր պարտականությունները։