Հայ կինոյի օրը Գրականության եւ արվեստի թանգարանում նշանավորվեց «Ֆրունզիկ Մկրտչյան. չգրված հետադարձ հայացք...» գրքի շնորհանդեսով եւ գրքի հեղինակի՝ կինոգետ, խմբագիր Ռոբերտ Մաթոսյանի հետ հանդիպումով:
Այս գիրքը մեծ արտիստի՝ Մհեր Մկրտչյանի չգրված մենախոսությունն է, որը հեղինակը ձայնագրել է ավելի քան 40 տարի առաջ: Ավելին՝ Ռոբերտ Մաթոսյանը, լինելով նրա մտերիմ բարեկամներից մեկը եւ «Ֆիլմ» թերթի խմբագիրը, տարբեր առիթներով ուղեկցել է արտիստին եւ ձայնագրել նրա հանդիպումները, արտերկրի կինոփառատոներում ականատես է եղել նրա աննախադեպ ընդունելությանը եւ հանդիսատեսի ջերմ սիրուն: Գիրքը, ըստ հեղինակի, ուղերձ է նոր սերնդին, չգրված հետադարձ հայացք, որտեղ Ֆրունզիկ Մկրտչյանը բացում է ինքնաճանաչողության, չափի եւ չափավորության, արժանապատվության գաղտնիքներն ու խորհուրդներ տալիս։ «Ձայնագրությունը կատարելիս մի նպատակ ունեի՝ բացել ու ներկայացնել Ֆրունզիկին որպես անհատականություն, մարդ, դերասան, արվեստագետ։ 40 տարի անց այդ ձայնագրությունը վերածվեց գրքի։ Աշխատել եմ չմիջամտել, շատ թեթեւ հարցեր եմ տվել, որ բացվի, խոսակցությունն առաջ գնա»,- նշում է Ռոբերտ Մաթոսյանը։
