Խորհրդարանի դահլիճի լարված մթնոլորտը, որը պարբերաբար պարպվում էր տարբեր մանր ու միջին լեզվակռիվներով, գոռգոռոցներով ու ի վերջո՝ փոքրիկ ծեծկռտուքով, ԱԺ նախագահ Ալեն Սիմոնյանին ստիպեցին օգտվել ԱԺ արտահերթ ելույթի իր իրավունքից։ Ալեն Սիմոնյանը առաջարկեց․ «Առաջարկում եմ` զրոյացնենք այն ամենը, ինչ այսօր եղել է։ Առաջարկում եմ` հարգելով ՀՀ քաղաքացիներին, համարենք, որ այսօր սպառել ենք իրենց համբերությունը և վերջացնենք այս հռետորաբանությունը մեկընդմիշտ։ Սա համարեք իմ ձեռքը, որ մեկնում եմ ձեզ, որևիցե ձևով թող ձեզ չկաղապարի։ Ես նման միտք չունեի, ուղղակի լսելով վերջին 2-3 ելույթները, ես համարում եմ, որ կարող ենք և պետք է աշխատենք միասին»: Ալեն Սիմոնյանը թե՛ թիմակիցներին, թե՛ ընդդիմությանը առաջարկեց` ՀՀ քաղաքացու «խաթր» հանել իրենց ելույթները և փակել պիտակումներ, որակումներ տալու էջը։
