Որեւէ բան չեն գտել, ոչինչ չեն հայտնաբերել։ Այն, որ խուզարկություն պետք է անեին, բնականաբար, բայց ոչինչ չեն հայտնաբերել։ Այս մասին «Հրապարակ»-ին ասաց Դավիթ եւ Միքայել Մինասյան եղբայրների պաշտպան Վարդուհի Էլբակյանը։
Փաստաբանի խոսքով` քննիչները հեռացել են դատարկաձեռն, տան ամեն անկյուն խուզարկել են, բայց որեւէ թուղթ, պլան, գծագիր չեն գտել, որովհետեւ չի եղել։
Փաստաբանը նաեւ նշեց` հաջորդիվ ՔԿ֊ն կարող է իրականացնել հարցաքննություն, առերեսումներ։
Ինչպես նա նշեց, տղաները հոգեբանական վատ վիճակում են, նրանք ընդամենը 18 տարեկան են, ունեն նաեւ առողջական խնդիրներ։
Հիշեցնենք` երեկ` Ծաղկազարդի օրը Սուրբ Աննա եկեղեցում Փաշինյանի թիկնապահները նախ քաշքշել էին մի երիտասարդի, որն ասել էր. «Ըտենց ինձ չնայես»։ Դրանից հետո ոստիկաններն ուժով երկու քաղաքացու էին բերման ենթարկել եկեղեցու տարածքից` զույգ եղբայրների, որոնք ամիսներ առաջ են չափահաս դարձել, ընդամենը 18 տարեկան են: Սովորում են ավագ դպրոցում՝ գերազանց առաջադիմությամբ:
