Ռումինիան փակում է հանրապետությունում Ռուսաստանի գլխավոր հյուպատոսությունը և վտարում հյուպատոսին։ Երկրի իշխանությունները այս որոշումը կայացրել են անօդաչու թռչող սարքի հետ կապված միջադեպից հետո։
Ռումինիայի Կոնստանցա քաղաքում Ռուսաստանի գլխավոր հյուպատոսը հայտարարվել է անցանկալի անձ։ Այս մասին հայտարարել է Ռումինիայի նախագահ Նիկուշոր Դանը։
Ավելի վաղ գրել ենք, որ երկու խաղաղ բնակիչ վիրավորվել է այն բանից հետո, երբ անօդաչու թռչող սարքը (Ռումինիայի պաշտպանության նախարարության նախնական հաղորդագրությունները ցույց են տալիս, որ դա ռուսական ԱԹՍ է) հատել է Ռումինիայի օդային տարածքը և բախվել Ռումինիայի, Ուկրաինայի և Մոլդովայի սահմանի մոտ գտնվող Գալաց քաղաքում գտնվող 10-հարկանի շենքին։
Ռումինիայի նախագահը միջադեպի հետ կապված ընդգծել է. «Ռումինիան ՆԱՏՕ-ի անդամ պետություն է և ոչ մի դեպքում թույլ չի տա, որ Ռուսաստանի կողմից Ուկրաինայի դեմ սանձազերծված ագրեսիվ պատերազմը տարածվի Ռումինիայի քաղաքացիների վրա»։ Այս իրադարձությունների աննախադեպ բնույթը պահանջում է հզոր, համակարգված և համաչափ արձագանք՝ ազգային, դաշնակիցների և միջազգային մակարդակներում»։
ՆԱՏՕ-ի գլխավոր քարտուղար Մարկ Ռյուտեն ևս արձագանքել է միջադեպին և նշել․ «ՆԱՏՕ-ն պատրաստ է պաշտպանել դաշնակիցների տարածքի յուրաքանչյուր թիզը։ Մենք կշարունակենք ամրապնդել մեր պատրաստակամությունը՝ կանխելու և պաշտպանվելու ցանկացած սպառնալիքից, այդ թվում՝ անօդաչու թռչող սարքերից։ Ռուսաստանի անզգույշ վարքագիծը վտանգ է ներկայացնում մեզ բոլորիս համար։ Նրանք շարունակում են թիրախավորել քաղաքացիական անձանց և քաղաքացիական ենթակառուցվածքները»։
ԵՄ դիվանագիտության ղեկավարը Կայա Կալասն ու Եվրոպական խորհրդի նախագահ Անտոնիո Կոշտան ևս դատապարտել են տեղի ունեցածը։
Կրեմլի խոսնակ Դմիտրի Պեսկովն էլ հայտարարել է, թե միջադեպի մասին զեկուցվել է նախագահ Պուտինին։
